Poi u Bernard ha Tura Police Station, da ka ejahar thymmai ujor ki Pulit WGH

Shillong, Naitung 28: Ki Pulit jong ka West Garo Hills District ki la ujor biang sa kawei pat ka ejahar ba thymmai ha ka sngi Palei hadien ba ki la lap ba uwei u heprit shynrang uba sah ha Farm House jong u nongïalam ka BJP, u Bernard Marak u la shah leh be-ijot.
“Katkum ka Medical Report, uwei na ki khynnah ba ïoh pyllait la lap ba u shah leh be-ijot,” ong u Superintendent of Police, u Vivekanand Singh Rathore.
“Kumta, halor kane ladep ban ujor biang da ka ejahar ba thymmai hapoh ki kyndon jong ka POCSO Act,” u la ong.
Ïa u Bernard mynta la wanrah kit sha Tura bad la tian bishar ïa u sha ka iingkashari bad ka Kashari ka la ai bor ïa ki Pulit ban set along 8 sngi, la ïathuh u Superintendent of Police ka West Garo Hills. Hynrei haka por ba u dang mih na ïingbishar la ïohi ba u Bernard u la kyllon bad la ïarap khyllie bad btin da ki Pulit ban kiew biang ha ka Kali ba wan kit ïa u.
Ha kajuh ka por, ka kynhun jong ka District Child Protection Unit (DCPU) ryngkat bad ki Pulit ka Meghalaya ki la leit sha Rimpu Bagan ban lum ïa ki jaiñ ki nep bad ki kot ki sla jong kitei ki khynnah ba ïoh pyllait im.
La ong ruh ba ha katei ka jingleit tohkit ki la lap ruh ïa kawei ka jingkhang ha kaba ki la lah ban plie bad ïoh kurup bun bah ki tiar pynbthei bad kiwei kiwei ki tiar mynsaw.
Ki tiar pynbthei ki kynthup ïa ki 35 tylli ki Gelatine stick, 100 tylli ki detonator, 4 tylli ki ryntieh (cross bow) bad 15 tylli ki khnam. Ïa kitei ki tiar baroh kiba ïoh la kurup lut bad la ong ba yn sa rah sha iing kashari shen.
“Ngin sa nang pynngat shuh shuh ïa ki kyndon hapoh ka Explosives Substances Act, 1908 pyrshah ïa u Bernard Marak,” ong u SP.
Dei ha ka sngi Balang, ïa u Bernard Marak la tian bishar sha Hapur District Court ha Uttar Pradesh hadien ba ula shah kem halor ka jingkynnoh ba u pynïaid ïa ka ktem awria ha ka Farm House jong u kaba la lap ruh ïa san ngut kiba dang rit rta ba la ïoh pyllait im da ki Pulit.
Ha ka 22tarik mynta u bnai, ki Pulit jong ka West Garo Hills ki la leit khynra ïa ka Farm House kaba la pynïaid da utei u MDC ka BJP kaba la poi haduh u pud ba 73 ngut ki shah kem bad la ïoh ruh ban pyllait ïa ki san ngut ki khynnah nalor ba ki ïoh ruh ban kurup ïa ki bilor kyiad bad kiwei kiwei.
Na ka liang jong u Vice President ka BJP u Bernard Marak u la kyntait mardor ba u la pynïaid ïa ka ktem awria ha ka Farm House jong u ba la tip kum ka Rimpu Bagan bad u la kynnoh ruh ba kane ka jingkhynra jong ki Pulit ka dei kaba la pynap lypa namarba ka BJP ka la nang ïohbor ha rilum Garo katba nang ïaid ki sngi.