Poi 20 ngut ki kyrtong MDC ba thep kyrteng ha Shillong, 11 ngut VPP, 4 KHNAM bad 2 Congress

Shillong, K’Lyngkot 29 : Ki la don baroh haduh 20 ngut ki kyrtong MDC na ki party bapher bapher kiba la pyndep ïa ka jingthep kyrteng ha kane ka sngi Balang ha Shillong, ba kynthup ha ISBT Mawiong kumjuh ruh ha ophis ka Deputy Commissioner ka East Khasi Hills, Shillong.
Na kine ki 20 ngut, 11 ngut ki kynthup tang na ka Voice of the Peoples Party (VPP), saw ngut ki kyrtong ki dei na ka KHNAM bad mar arngut na ka Congress bad kyrtong shimet. Katba uwei pat dei u kyrtong ka HSPDP na Sohiong.
Lada ïaid katkum ki constituency, na Sohryngkham ba thep kyrteng ha kane ka sngi dei u kyrtong ka Congress,Bah Jonathan Syiem.
Na Mawkynrew ki don ar ngut kiba thep kyrteng. Kine ki kynthup ïa u kyrtong ka KHNAM Bah Pynshai Mawrie bad u kyrtong ka VPP Bah Seiborlang Warbah.
Na Nongkrem ba thep kyrteng ha kane ka sngi dei tang u Bah Kitborlang Syiem na ka VPP.
Na Langkyrdem – Laitkroh Constituency Bah Shemborlang Rynjah kyrtong ka VPP.
Na Mylliem pat ba thep kyrteng ha kane ka sngi dei tang ka Kong Aibandaplin F Lyngdoh kyrtong ka VPP.
Na Laban – Mawprem constituency ba thep kyrteng dei tang u Bah Danny Langstieh na ka VPP.
Na Nongthymmai u kyrtong ka KHNAM Bah Ericton Donbok Swer bad u Bah Winston Tony Lyngdoh na ka VPP.
Na Mawkhar – Pynthorumkhrah pat ki don lai ngut ki kyrtong ba thep kyrteng hynne ka sngi. Kine ki kynthup ïa u kyrtong ka Congress, Bah Pynshngaiñ Syiem, Bah Raymond Basaïawmoit na ka KHNAM bad Bah Strongpillar Kharjana na ka VPP.
Na Jaïaw kyrtong ka KHNAM Bah Thomas Passah bad u Bah Denzil Raynard Chen kyrtong ka VPP.
Na Mawlai ba thep kyrteng ha kane ka sngi dei tang u kyrtong ka VPP Bah Eddieson Kharumnuid.
Na Mawphlang – Diengiei ki don arngut ba thep kyrteng bad kine ki kynthup ïa u Bah Mawkordor Rynjah bad u Bah Lancaster Marbaniang kyrtong ka VPP.
Na Nongspung – Sohiong ruh ki don arngut bad kine ki kynthup ïa u Bah Stodingstar Kharjana na ka HSPDP bad ka kyrtong shimet Kong Sony Kharjana.
Katba na Nongshken ba thep kyrteng ha kane ka sngi dei tang u Bah Manbhalang Rynjah kyrtong ka VPP.