Jowai, Nailar 26: U Abhinav Kuman Singh IAS uba long ruh u Sub Divisional Officer (Civil) jong ka Amlarem Sub-Division ula plie paidbah hynin ka sngi ïa ka training kaba la pynlong da ka Society for Urban and Rural Empowerment (SURE) ha ka Dorbar Hall jong ka shnong Syndai Kmai Shnong West Jaiñtia Hills District.
Ha kane ka sngi palat sanphew ngut ki nongwan shim jinghikai kila wan ban ïashim bynta ha kane ka jingïalang. Haka jingkren jong u kum u kongsan u Abhinav ula ong ba kane ka training ka long kaba donkam bha na ka bynta ki samla jong kane ka thaiñ bad u sngewkmen ba nalor kaba ai training, ka SURE ka shimkhia ruh ban ai training halor ki jingbam tynrai jong kane ka thañ ruh.
U Abhinav ula ong ruh ba ha dang shen uwei u nongshet na Assam ula jop ha ka jingïakop Maser Chef bad u kylli ba lada na Assam ki lah ban jop balei ki briew jong ngi kin ym lah?
Kane ka training kan long na ka bynta 17 sngi bad ki jait jinghikai kiba yn sa ai ha kane ka training ki dei, ka rukom shet ïa ki jingbam Indian, ki jingbam Chinese bad ki jingbam tynrai. Kane ka training ka dei kaba la ju leh ha kiwei pat ki jaka hapoh ka thañ ha ki snem ba mynshuwa kum ha ka shnong Nongtalang, Amlarem, Nongbareh bad Darang.
Ha kane ka sngi la ïoh ïa ka jingkren na u Dr. H.H. Mohrmen uba la ïathuh shaphang ka SURE, ki kam ba ka trei bad ka shaphang ka training ruh kumjuh.
Naka liang jong u ma Lambor Suchen uba long u Skill Development Officer ula batai kane ka Project ka wan ka ministry kaba dei peit ki thaiñ khappud bad la pyntreikam ïa ka da ka ophis jong u SDO Amlarem, u DC bad ka Skill Development.
U ma Daman Lakashiang uba long u Daloi jong ka Elaka Satpator ula pynpaw ïa ka jingsngewnguh ba ka sorkar kala paitkhmat sha ka Elaka bad u ngeit skhem ba kane kan ïarap khamtam ïa ki samla ki bym pat ïohkam ïohjam. Ïaka prokram la pynïaid da ka samla Ilasiewdor Gashnga kaba peit ïa ka kam ai training hapoh ka SURE.
Ki nongshim Training kiba la wan ïashim bynta ha kane ka sngi ki dei ki samla na ka shnong ba marjan kum na Amlari, Jong u chen, Amjalong, Nongtalang nalor ki shnong kiba hap hapoh ka Syndai kum ka Syndai kmai Shnong, Syndai Mission bad Syndai Lyngkot.
Ha kane ka sngi la ïadonlang ruh u Donbok Syndai uba long u Waheh Chnong ka Syndai Kmai Chnong bad ïa ka jingbam sngi ha kane ka sngi la pynbiang da ka Kynjoh Shphrang SHG na Syndai Mission.
