Rongjeng, Naiwieng 11: U Myntri Rangbah ka jylla u Conrad K Sangma ha ka sngi Thohdieng u la plie ïa ka Rongjeng Civil Sub – Division kiba hap hapoh East Garo Hills hadien 40 snem tam ba la mih ka jingdawa.
Ha kane ka sngi la wan sakhi lang da u Deputy Speaker ka Ïing Dorbar u Timothy D Shira, ha ka jingïadon lang kiwei pat ki MLA ba kynthup ïa u Jim Sangma, u Thomas A Sangma, u Brening Sangma, u Rupert Momin bad u Pongseng Marak.
Ka jingdawa ban buh ïa ka Rongjeng Civil Sub-Division ka la shu sah pongding la palat 40 snem bad dei ha u 2017 ba la plie ïa ka Administrative Unit ha Rongjeng, bad kaba la kyntiew sha ka Civil Sub Division ha ka sngi Thohdieng lyngba ka notification ba la pynmih da u Lat ka jylla.
Kane ka Civil Sub Division kan kynthup ïa ki jaka ba hap ha Rongjeng C&RD block bad ka jingdon ki shnong ha kane ka Sub-division ka long kumba 180 tylli eiei.
Haba kren ha kane ka sngi u MLA ka thaiñ u Jim Sangma u la pynpaw ïa ka jingsngewnguh ïa u Myntri Rangbah ka jylla uba la pynurlong ïa kane ka jingangnud kaba la slem bah ki paidbah ka thaiñ. U la oing ruh ba kane ka jingplie ïa kane ka Civil Sub Division ba thymmai ka long ruh kum ka jingpynurlong ïa ka thong kaba u Purno hi u long uwei na kiba angnud ban don ka Civil Sub Division Rongjeng.
Ha kane u Myntri Rangbah u la plie ïa u Mawnongrim kum ka dak ka jingplie ïa ka Rongjeng Civil Sub Division bad u la aiti ruh ïa ka notification sha u SDO ba nyngkong eh ka Civil Sub Division u Reuben Momin.
“Ka long ka khyllipmat kaba khraw bad kaba shlei jingkmen ruh ban lah ban pynurlong ïa jingdonkam ki paidbah ka thaiñ” ong u myntri Rangbah ha ka jingkren jong u.
U la ong ruh, “U PA Sangma u don ka jingïadei kaba jan bha bad ki paid nongshong shnong ka thaiñ bad na ka liang ka sorkar ruh ka don ka thong ban wanrah ïa ka jingkiew shakhmat ka thaiñ Rongjeng bad ka jylla hi baroh kawei.”
Shuh shuh u la bynrap, “Ka dei ka thong jong ka sorkar ban wanrah ïa ki ophis sorkar kham sha jan bad ki paidbah bad dei na kane ka daw ba ngi thmu ban plie shuh shuh shibun ki block bad ki Civil Sub Division ba ki paidbah kin suk ha kaba ïadei bad ki ophis sorkar.”
U la ong ruh ba na ka liang ka sorkar ka don ka thong ban kham pynsuk ïa ki paidbah ban kham kyntiew ruh ïa ka ïoh ka kot bad ban pynurlong ïa ka jingdonkam jong ki.
U Myntri Rangbah u la ïathuh ruh ïa ki kahna jingjop kiba ka sorkar MDA ka la lagh ban pynurlong ha kine ki 5 snme duna kum ka jingpyntrei ïa ka Jal Jeevan Mission, ka MGNREGS, ka Focus bad ka Focus plus.
