Plie u Myntri ka koit ka khiah ïa ka ïew ki nongrep ha Jengjal

0

Shillong, Kyllalyngkot 14 : U Myntri ka tnad ka koit ka khiah u James P.K Sangma mynta ka sngi Saitjaiñ u la plie paidbah ïa ka ïew ki nongrep ne ka Farmer’s Market ha Jengjal kaba jngai kumba 36 Km na ka nongbah Tura.
Kane ka ïew kaba la ohdur pynitynnad bha ka don harud ka surok NH 51 ha Jengjal, West Garo Hills. ïa kane ka ïew la bei pisa da ka tnad Tribal Affairs jongka sorkar pdeng haduh 9..82 klur tyngka bad la pyntreikam ban pyndep ïa kane ka jingtei da ka District Rural Development Agency (DRDA). La sdang ban tei ha u snem 2020 bad la lah ban pyndep tang hapoh arsnem.
Lyngba kane ka ïew ki nongrep kin ïoh ban die bad buh ruh ïa ki mar jongki ba kin ym pyut. Kane ka ïew kan long kum ka phang pdeng ïa ki nongrep ba kin pynïaid ïew ïa ki mar rep jongki bad khamtam kan ïarap ïa ki SHG, ki Cooperative Society, ki producer group ba kin pynïaid ïew ki ïa ki marrep. Ha kane ka jaka ki nongrep ki lah ban lum thup ïa u kwai, u sying, u sohmarit, u pathaw bad kiwei kiwei ki marrep.
Haba kren haka jingïalang, u myntri James P.K Sangma u la ong “ ïa kane ka ïew la tei ha kata ka nongrim da kaba peit jngai kumno ba kan ïarap ïaki nongrep nangne shakhmat bad hapoh ka jylla ki don tang ar lane lai tylli ki ïew kiba kum kine. Ka sorkar ka la leh ïa kane da ka jingthmu ban kyntiew ïa ka rep ka riang khnang ban riewspah ki nongrep na kaba ki ïoh ban die ïa ki mar rep jongki. Ka sorkar ka la ïarap bha ïa ki nogrep da kaba pyntreikam ïa ki skhim bapher bapher kum ka 1917 Agriculture Transport Vehicular Scheme, Focus ad Focus+ ha kaba lyngba kine la ïarap ïaki nongrep da ka pisa ba kin thied ïa ki symbai bad ki sboh ban pynkhlaiñ shuh shuh ïa ka rep ka riang jongki. Kine ki skhim kila ïarap da shisha ïaki nongrep namar ki ïoh ruh ban ri ïa ki jingri. Ka sorkar ka leh kumne ban kyntiew ïa ki nongrep namar ha kane ka jylla kumba 70 % ki nongshong shnong ki dang shaniah ha ka rep ka riang”.
U la ong shuh shuh ba kane ka ïew ba thymmai kan long kum ka jingkyrsiew bad ai mynsiem ïa ki nogrep ha katei ka thaiñ.U la kyntu ïa ki briew ba kin ri kin sumar ïa kane ka ïew bad shim ba ka long kum ka nongkynti jongki. U la ïathuh ruh ba yn sa thaw da ka committee ban peit bad pynïaid ïa kane ka ïew ha ka rukom kaba bit ba biang.U James uba dei u MLA jong ka thaiñ ula buh mawnongrim ruh ban teng ïa ka Jengjal Multipurpose Indoor Sport Complex kaba don hi marjan bad kane ka ïew. ïa kane yn tei kat kum ka Khelo India Scheme ha ka jingmang tyngka ba 8.54 klur tyngka.

Leave A Reply

Your email address will not be published.