Shillong, Kyllalyngkot 14 : Ka sorkar synrop lang Meghalaya Democratic Alliance (MDA) hapoh ka jingïalam jongka NPP bad u Myntri Rangbah ka jylla u Conrad K Sangma ka la wanrah ka jingkylla kaba khraw ha ka nongbah Tura, ong ka NPP.
“ Hapoh ka jingïalam jong u Myntri Rangbah ka nongbah Tura ka la kylla dur bak-ly-bak bad mynta ka la long ka nongbah kaba itynnad bad khring ïa ki paidbah namar ka la kiew ha baroh ki liang” ong ka khubor na ka NPP.
Ka NPP ka la ong ba khatduh eh ka Tura ka la ïoh ïa kane ka jingpynbha briew bad pynitynnad ïa kaba ka la duh baroh shikatta bad long kawei na ki nongbah ba sahdien. La ong shuh shuh ba kane ka jingkylla ha ka nongbah Tura kan long ruh ka jingkhring ïa ki nongwan jngohkai ban wan sha ri lum Garo namar ha ri lum Garo ruh ki don ki jaka jngohkai ba itynnad kum u Nokrek, ka krem Siju bad kiwei kiwei ki jaka jngohkai pyrthei.
Ka NPP ka la ong ba ka Tura ka dei ban ïoh ka jingïaroh namar kane ka jingkylla dur jongka. La ïathuh ba ïa ka PA Sangma Footbal Stadium kaba heh bad ngiam ban shong 9500 ngut ki nongwan peitkai ruh la dep tei bad kane ka dei ka stadium ba nyngkong eh ban tei da ki nar kiba la dep shna lypa PRE-FAB bad la lah ban pyndep ïa ka hapoh arsnem. Kane ka stadium mynta ka la biang lut nadong shadong bad la lah ban pynlong ïa ka jingïalehkai phutbol mynmiet ruh.
ïa ka Chanmari Stadium ruh la dep pynbha bad la shna da u artificial turf bad kane ruh ka ngiam ban shong kumba 3000 ngut ki nongwan peit kai.
ïa ka Tura PRIME Hub kaba la tei ha ka jingheh kaba 3200 Sq.Ft la dep plie bad mynta la sdang ban treikam bad kane ka long khamtam ïa kito kiba sengkam seng jam lajong.Kane ka jaka ka ngiam ban trei kumba 40 ngut ei ei bad ka dei kaba la pynbiang lut nadong shadong ryngkat ki computer.
Nalor kane la dep buh mawnongrim ruhban tei ïa ka Tura Integrated Hospitality & Convention Centre, ong ka NPP.
Kane ka Convention Centre kan don ka bynta ban pynneh pynsah ïa ka kolshor bad ka jinglong tynrai jong ki Garo. Ka NPP ka la ïathuh ba ki dang don shuh shuh bun ki projek kiba u myntri rangbah u dang pynkhreh ban wanrah ha Tura bad khamtam ban pynitynnad ïa ka nongbah da ka jingthung dieng, ban pynheh ïaki surok, ban dro jingdro ha ki kynroh ban pynthaba da ka bording bad ter ter.
