Da ka surok ba 2.82 klur yn pynïasoh ïa ka Myrkhan – Mawklot shwa ka Presbytery

0

Shillong, K’Lyngkot, 14 : Ka shnong Myrkhan ha ka sngi Thohdieng ka la ïoh pdiang da ka surok ba 2.82 klur tyngka ka ban pynïasoh ïa kane ka shnong bad ka shnong Mawklot, Upper Shillong kaba jia ryngkhat ruh shwa ban long ka Presbytery ha katei ka thaiñ mynta u snem.
Ïa u mawnongrim ban shna ïa katei ka surok ba don kumba 700 mitar la wan ban plie da u Deputy Chief Whip ka sorkar jylla, Bah Pynïaid Sing Syiem ba dei ruh u MLA ka Mawryngkneng ha ryngkat u Bah Hamlet Dohling, MLA ba dang shu dep resain shen na ka kam.
Haba kren ha ka jingïalang, u Kongsan, u la ong ba ha ka jingim briew hi ka surok kadei ka bynta kaba kongsan tam ban pynsuk bad kyntiew ïa ka ïoh ka kot khamtam eh ha ki nongkyndong ba dang im daka rep ka riang bad ka ri jingri.
U la ai ruh ka jingïaroh ïa u Bah Hamlet uba nalor ba u trei borbah na ka bynta ka constituency u la noh synniang ruh shibun na bynta ka jylla khamtam eh ha ki ishu kiba ktah wat ïa ka constituency jong u.
“Dei u MLA jong phi kum u Myntri uba la weng noh ïa ka notification kaba ïadei bad ka building bylaws jong ka sorkar kaba ngi ki shnong ha Mawryngkneng ruh ki mad bad khih pyrshah jur bha ha kito ki snem haduh ba ngi la jngem lut na ka jingshah tied,” ong u Bah Pynïaid.
U Bah Hamlet u la pynpaw ka jingsngewnguh ïa ki trai jaka kiba la shah ban pynïaid ïa katei ka surok na jaka jongki ban poi sha Sohtyngab, Myrkhan. “Dei ka jingstad jong phi ban jied ïa ki nongmihkhmat ba mynta phi la ïoh ïa kane ka surok kaban sdang pyntrei noh naduh ka taiew ban wan. Kane baroh ka urlong dei na ki jongphi hi,” u la ong
Nalorkata, u la ïathuh ruh ba u la trei shitom bha ban pynurlong ïa katei ka surok khamtam haba katei ka thaiñ kan pdiang artad ïa ka Presbytery mynta u snem.
Shwa kane, ki nongïalam shnong na Myrkhan ki la pynpaw ba kiban kmen nyngkong eh lada dep katei ka surok dei ki khynnah skul kiba ju pyndonkam daka lynti ïaid kjat ban leit skul kum sha Mawklot bad ki jaka ba marjan.
“Kane kan ïarap ïa kiba na Laitmynsaw bad Nongpyiur ruh kumjuh kaba don ka dheng kali namar nangne kan mih sha Mawklot, Nongumlong ter ter sha Umlyngka bad Kynton,” u la ong.
Ha kane ka sngi la donlang ruh ki nongïalam shnong na kitei ki shnong ba marjan bad khamtam ki paidbah nongshong shnong kiba la mih ryntih ban pynpaw ïa ka jingkmen ba khatduh kin sa ïohi noh ïa ka surok ban poi sha shnong jong ki.
Ha kane sngi, u Bah Hamlet u la pyntip ruh ba shen yn pynbha noh ïa ka madan ïalehkai kaba don ha ka thaiñ ha ka jinglut kaba kot sha ka 70 lak tyngka.

Leave A Reply

Your email address will not be published.