Shillong, Nailur 10: U Myntri ka tnat Textiles jong ka sorkar jylla u Bah Paul Lyngdoh bad uba dei ruh u nongai ktien ka sorkar jylla u la plie ïa ka Meghalaya Textiles Mural ne ka dur ba la pyndait ha ka kynroh hakhmat ka ophis jong kane ka tnat ha ka jingdonlang u Commissioner bad secretary ka tnat Arts and Culture u Bah F Kharkongor bad kiwei kiba la shah khot sngewbha.
Ha ka jingkren jong u la ong ba bun na ki jaka kat shaba phai kin don beit ki kyntien ba thoh wat biah ne tah shun ha ki kynroh hynrei mynta pat ha kane ka jaka ka la ïeng pynban da ka thei bha briew bad u la ong ba na ka liang ka tnat kan ïaleh katba lah ban pynbha briew ïa kiba bun ki jaka khnang ba kan khring ïa kiba wanjngohkai bad kumjuh ruh ban pynitynnad ïa ka jylla.
“Nalor ba ka jylla ka la long lypa kaba itynnad da ka jingdon ka mariang kaba itynnad mynta lada mih sa kum kine ki jingairong bad ki dur ki dar ha kiba bun ki jaka kan nang khring shuh shuh ïa ka jingitynnad jong ka jylla bad ka nongbah Shillong,” ong u Bah Paul.
U la ong ruh ba lyngba ki longshwa manshwa la hikai ban long kiba leh khuid bad kumta ka jaitbynriew ruh ka bat ïa kane ka bynta naduh ba la ïoh ki jinghikai naduh mynshwa kumta dei ban pynneh pynsah ïa kane. “Kawei na ki kam kaba la ju leh hangne kadei ka jingleh khuid kaba la sdang naduh ki ïing ki sem bad shaduh shabar bad haba leit sha manla ki ïing ne ki shnong ngin ym lap ban don kiba thoh wat tah shun hangne lait tang lada ngi leit sha ki ophis sorkar ngin lap ba don ka jingthoh wat tah shun hangne naba bun ngim pat shim ba kadei ka ïing lajong, kumta donkam ban long kiba leh khuid ruh haba mih shabar,” u la ong.
