Plie u MLA ïa ka jingtei ka ïing skul thymmai ka Balat Bazar Govt. L.P School

Mawkyrwat, Jymmang 27 : Ka long kaei kaei ka jingaimynsiem na ka bynta ka shnong ka thaw, ki nongpynïaid skul, ki kmie ki kpa khamtam eh ki khynnah skul ha kaba u bah Pius Marweiñ uba dei MLA/MDC ka Ranikor Constituency u la ïoh ban plie ïa ka ïing skul kaba thymmai jong ka Balat Bazar Government Lower Primary School ha ka shnong Balat namar ba ïing skul kaba rim ka la shah rong noh ha ka um ha u snem 2009.
Lah ban kdew ba ïa ka Balat Bazar Government Lower Primary School la tei ha ka jingmang pisa kaba T. 44 lak hapoh ka School Infrastructure Upgradation Projects kaba dei ha ka Phase-III ba la bei pisa hapoh ka State Scheme jong ka Sorkar Meghalaya.
U bah Pius Marweiñ uba dei MLA/MDC ka Ranikor Constituency haba ai jingkren u la pynkynmaw ba ha ki snem kiba la leit kane ka skul pule bunsien ka sah hi tang ka kyrteng hynrei katba nang ïaid ki sngi bad ki snem ka la nangkiew lyngba ka jingtrei shitom jong ka shnong bad ki nongpynïaid skul, kumta u la ai mynsiem ba da ka jingïoh ban plie ïa kane ka jingtei kaba thymmai ba la bhah da ka sorkar ka sa long ka jingkyrmen ïa ka lawei jong ki khun ki kti kiba wan shah hikai da kaba ong ruh, “Ka jingnang jingstad ha kine ki sngi ka long kaba donkam bad kordor haduh katta katta”.
U la pynshai shuh shuh ba kum u nongmihkhmat haba u la jop ha ka jingïaleh, um shym la phai ban pynïoh kam pynroi tang ha ki lynti ki synkien, ki um-bam um-dih bad kiwei de hynrei u la phai khmat kyrpang ruh ha ki bynta jong ka pule puthi lyngba ki skul pule (jingtei) khnang ba kan long ka jingmyntoi ïa ki khynnah kiba kwah ban tbeh jingshai ban kiew ha ka pule puthi.
Ha ka jingkren jong u Myntri jong ka shnong Balat ha kaba ïa dei bad ka history lyngkot jong ka Balat Bazar Government Lower Primary School u la ïathuh ba ka ïa kane ka ïing skul la shah rong um noh ha ka snem 2009 bad kaba la pynjynjar sat ïa ka shnong ka thaw ha kaba la hap pynlong skul shipor ha ïing briew namar ka jingduh noh ïa ka ïing skul.
Ym tang kata, ula bynrap ruh ba ki nongpynïaid skul ki la pyrshang da ki phew tylli ki snem ban wan rah biang ïa ka ïing skul hynrei ym don ba pynsngap ïa ka jingud jong ka shnong Balat. Kumta, dei tad hadien ka jingwan jong u bah Pius Marweiñ kum u MLA ha kaba ula lah ban wan rah biang ïa ka ïing skul kaba thymmai ha kaba mynta la ïoh syndon ban plie bad ban pynlong skul ha kane ka ïing skul.
Ha kane ka sngi la sakhi lang da u bah S. Skhemlon uba dei u Block Mission Co-ordinator jong ka Mawsynram Block, lem bad ki kmie ki kpa jong ki khynnah skul kumjuh ruh ki rangbah jong ka shnong Balat.