Shillong, Jymmang 27: U nongïalam ka liang pyrshah bad Myntri Rangbah ka jylla u Mukul Sangma u la ong ba kane ka sorkar ka la kulmar, naba ka la ai jingkyrshan pisa sha kawei ka skul shimet na ka pisa jong ki paidbah.
Haba kren sha ki lad pathai khubor u Sangma u la ong, “Aiba ngin long kiba shai, kane ka sorkar ba mynta imat ka la kulmar bad ka la sdang ban ai ki jingmyntoi sha ki skul ba la thaw ne shna da ki riew shimet na ka pisa paidbah ha kaba ïadei bad ka kam pule puthi.”
“Namar kata kino kino ki skul kiba ïoh jingïarap mynta la buh kyrdan kum ki adhoc school, hynrei baroh ki skul ba la buh da ki shnong ki dei ki skul kiba lah ban ïoh ki jingkyrshan na ka sorkar ym pat ïa ki skul shimet,” u la bynrap.
Haba ong ba ka don ka jingduna ka jingpynshai na ka liang ka sorkar, u Myntri Rangbah barim u la ong, “Namar kata na ka jingjubab jong u Myntri Rangbah nga lah ban ong ba ka don ka jingkhleh lang bad kine ki skul shimet bad ki skul adhoc da kaba pyrkhat ba ki skul adhoc ki dei ki skul shimet.”
“Kino kino ki skul ba ïoh ki jingïarap na ka pisa paidbah ki dei ki skul jong ki shnong ym ki skul shimet. Ngim ju ai kano kano ka jingïarap pisa sha kito ki skul ba la pynmih da ki riew shimet ha ka dur ki kam khaïi naba ki shnong ki long barabor kiba hakhmat ka sorkar,” u la ong.
Shuh shuh u Sangma u la ong ba ka sorkar ba mynshwa ka pyrshang ban weng ïa kam saiñ pyrthei halor ka kam pule puthi da kaba pyrshang ban kyntiew ïa ka tulop ki nongtrei sorkar la ki dei ki skul sorkar, ki adhoc bad skul SSA.
“Namar tang haba phi kyntiew ïa ka tulop ki nonghikai ha ki kyrdan jong ki skul, kiba la ïoh jingïarap pura na ka sorkar jylla, ka sorkar pdeng kan sa shim khia ïa ka jingpynkiew tulop kiba hab ha ka SSA bad RMSA bad kiwei pat ki prokram ka sorkar pdeng.”
U Myntri Rangbah barim u la kdew ruh ba wat hapdeng ka jingdon jong ki skul ha ki kyrdan bapher bapher, bun ki skul sorkar ki la leh bha hadien ba la thung da ki nonghikai ba thymmai kiba la pyntbit ha kine ki phew snem ba la leit.
“Ha ka jingshisha ha ki snem ba la leit, ha ki snem 2014, 2015, 2016 nga sngewkmen ban ïohi ba la jan 100% ki samla pule kiba la pass ha ka class 12 science, ki la poi ha ka kyrdan first division,” u la bynrap.
