Shillong, Jymmang 27: Ka sorkar jylla ka la pynlait ïa ki guidebook na ka bynta baroh ki nonghikai naduh ka klas kaba I haduh X da ka jingthmu ban pynbha ïa ka pule puthi ki samla pule.
Haba pynbna ïa kane ha ka sngi baar, u Commissioner & Secretary in-charge Education u Vijay Kumar Mantri u la ong ba ki guidebook, ka dei ban pynbha ïa ka kam hikai jong ki nonghikai, kaba dei ruh shi bynta jong ka CM IMPACT jong ka sorkar jylla.
“Ka jingbuh ïa ki textbook la ka jong na ka bynta ki nonghikai ka long ban pynlah ïa ki ban sngewthuh kumno ban hikai ïa ki samla pule,” u la ong da kaba bynrap, “Ngi buh ka thong halor ka kam hikai ha kaba kum kino ki nuksa u nonghikai u lah ban quote, kiei ki jingïalehkai ne play un lah ban pynrung ha ka kam hikai. Kaei kaba ngi dei ban hikai bad kiei ki nuksa, kumno ban pynsuk ïa ki subject bad ban hikai ïa ki khynnah skul ne khyllah pule. Kine ki dei ki kam ngi la buh ha ki guidebook ha kaba ki nonghikai kin lah ban pule ïa ka guidebook bad ban hikai ha ka lynti kaba bha.”
U Mantri u la pyntip ba ka tnat pule puthi dangshen ka la pynlong ïa ka prokram ba shi bnai kaba la khot ka Meghalaya Class Readiness Programme (MCRP) kaba dang dei hapoh ka CM IMPACT.
“Kane ka programme ka dei ban weng ïa ka kam kaba thylli hapdeng ki class IX bad X bad ban wanlam ïa baroh ki samla pule hapoh kawei ka nongrim bad ka kyrdan khnang ba kin lah ban sngewthuh kawei kaba ki nonghikai ki hikai. Ha shwa ba kin leit sha class bad ka teaching lesson kaba dei ka number one, bad ngan hikai ïa ki tynrai sha ki. Kane ka dei kaba ngi la lah ha kine ki shibnai bad kane kan pyni ïa u soh ka jingmih ha u snem ban wan,” u la ong.
U la pynbna ruh da kaba ong, “Ngin wanrah ruh ïa ka Meghalaya Learning Enhancement Programme ban ïarap ïa ki nonghikai ban pynbha ïa ki rukom hikai jong ki. Ngin ïathuh ïa ki kum kiei ki jingïalehkai ba ki lah ban leh ban hikai ha ka lynti kaba bha bad kum kino ki nuksa ki dei ban ai.”
Haba kylli shaphang ki jingpynkhreh na ka jingwan biang ka khlam Covid-19 bad kaba la saphriang ruh ha ka ri, u Mantri u la ong ba ka tnat ka la long kaba la khreh lada wan kino kino ki jingjia.
“Nga tharai ba ka rukom ai jingtip lyngba ki kor computer ka la nang khambha. Bun na ki skul ki la don ïa ki smart class bad ngi don ruh ki tiar ba la pynbiang. Ka DERT ka la leh bha ïa ki kam ha kane ka bynta naba haba manla ki subject ka don beit ka video lesson kaba la don lypa. Kumta ka tnat pule puthi ka la long kaba la pynkhreh lada wan kano kano ka jingjia,” u la bynrap.
