Ka skul St. Jude SS bad ki paidbah kim dei shuh ban mad ïa ka jingshlei um, kular u MLA bad DC

Nongpoh, Jymmang 27: Hadien ba ki paidbah nongshong shnong ka Umpher, ha Ri Bhoi District, khamtam eh ki khynnah pule ka St. Jude Secondary School, ki ju mad jingeh man ka por lyiur na ka jingshlei um ryngkat ka umsaw bad ka khyndew kaba tuid sha shnong, kumba la sakhi shuh shuh ïa kane ka jingjia ha kine ki khyndiat sngi ba la leit noh ba ka um ka la dap wat ha ki klas bad ruh ha ki iing briew, kaba la buh jingeh shikatdei eh ïa ki paidbah bad haduh ba ki bor pynïaid skul ki la hap ban ai shuti ïa ki khynnah.
Halor kane, u Bah Sosthenes Sohtun, MLA ka Jirang, mynta ka sngi u la shimkhia ban lum lang ïa u DC ka Ri Bhoi, ki nongmihkhmat ka NHAI, DDMA, PWD ki bor shnong bad ki bor pynïaid ka skul ban jurip lang ïa ki nala bad ki lynti ba tuid ka um. Kane ka long ban ïaleh pyrshah ïa katei ka jingeh bad ban peit ba kum kine ki jingshlei um kin nym jia shuh ha katei ka jaka.
Haba kren sha ki lad pathai khubor na ka liang u Bah Sosthenes Sohtun bad u Abhilash baranwal Deputy Commissioner ka Ri-Bhoi District ki la pynpaw ka jingsngewkhia halor ka jingeh ba mad da ki paidbah bad kumjuh ruh katei ka skul pule ha katei ka jaka na ka por shaka por bad kum u MLA ryngkat ka jingïatreilang bad ki bor district kin sa shimkhia ban wad ki lad ki lynti ban weng syndon ïa katei ka jingeh ha katei ka jaka ba ki paidbah kim dei shuh ban mad.
Ki la ong ruh ba kumba long mynta ki bor pynïaid skul ka St Jude Secondary School ki hap ban ai shuti ïa ki khynnah na ka daw ba ka um ka rung shaduh ki kamra klas bad ka phyllaw jong katei ka skul ka kylla long kum ka pung um.
Shuh shuh na ka liang u MLA u la ong ruh ba un sa ïakren bad u Myntri Rangbah ka jylla ban pynheh ïa ka nala namar ba sha shilliang jong u surok ka la hap sha ki bynta jong ka Assam khnang ba wat ka sorkar Assam kan shimkhia ban snohkti lang na ka bynta ban weng ïa katei ka jingeh.
U Principal ka skul St. Jude Secondary School, u Brother Nicholas Rimai, u la pynpaw ba ka daw tynrai jong kane ka jingtuid khyndew bad jingshlei um ka dei namar ka jingtih khyndew ha ka thaiñ Killing. Kane ka la ktah jur ha katei ka thaiñ, kaba la pynlong ïa ka skul bad ki paidbah ban mad jingeh man ka por lyiur bad pynpaw ruh ka jingsngewkmen hadien ba u MLA mynta ka sngi u la shimkhia ryngkat ki bor district bad NHAI, PWD bad kiwei kiwei na ka bynta ban weng ïa katei ka jingeh.