Plie u Bah Pius Marweiñ ïa u mawnongrim ban tei ïa ka Block Development Complex ba 2 klur tam

Hadien 30 snem jong ka jingïaid lynti ban shakri ïa ki paidbah

0

Mawkyrwat, K’lyngkot, 04: U bah Pius Marweiñ, MLA/MDC jong ka Ranikor Constituency mynta ka sngi ula ïoh ban plie ïa u mawnongrim ban tei ïa ka ‘Integrated Block Development Complex’ ne ka jingtei ba thymmai jong ka ophis u BDO Ranikor C&RD kaba don ha Ranikor C&RD Block kaba ha ka jingmang tyngka kumba T. 2 klur 77 lak ha ryngkat ka jingïadonlang ki ophisar sorkar jong ka Ranikor Civil Sub Division, South West Khasi Hills District.
Haba kren ha ka jingïalang u bah Pius u la pynpaw ïa ka jingsngewkmen ban ïa don ha kum kane ka sngi ba nyngkong jong u snem ban pynlong ïa ka jingïalang ba kyrpang ban plie ïa u mawnongrim jong ka jingtei ïa ka ïing kaba thymmai jong ka ophis u Block Development Officer, Ranikor C&RD Block ha ka jingmang pisa kaba T. 2 klur 77 lak tyngka lyngba ka Ministry jong ka Community & Rural Development na ka Sorkar India bad kane ka jaka kam duna shuh ïa ka 680 sq meters. “Lyngba ka jingtei ïa ka ophis treikam ba thymmai ka ban sa long ka jingïarap bad khamtam eh ban pynïar ïa ki jingtreikam kiba long ka jingmyntoi jong ki paidbah ba bun balang”, u la ong.
Ha kajuh ka por u bah Pius u la ong ruh ka jingtreikam jong kane ka ophis u BDO naduh ki snem kiba la leit ka la long ka jingkyrkhu kaba khraw ïa ki paidbah, bad bun ki nongtrei ki la ud la nam namar ka jingkhapngiah ha kaba ki hap ban ai ka jingshakri ka bym duna shuh ïa ki 157 tylli ki shnong hapoh jong ka Ranikor C&RD Block, kumta u kyrmen ba lyngba ka jingdon jong ka jingtei kaba thymmai bad kaba kham heh kan sa long ka jingmyntoi ïa u paidbah. U pynkynmaw ruh ba hapoh ka ophis jong u BDO Ranikor C&RD Block ki don shibun bah ki kam pynroi ba ka sorkar ka la dep ban buh naduh ki jingïarap ïa ki longïing ba duk, ki skhim jong ki ‘riew tymmen bad kiwei de ha kaba ki donkam ban don ka jingtei kaba kham heh.U la pynkynmaw ruh ba hadien ka jingïaid lynti kaba 30 snem ki la don shibun ki ophisar kiba la long BDO bad hapdeng kine ki snem kiba bun hi ki don shibun bah ki jingduna. Nangta, u la ban ruh ba bunsien haba wanrah ki kam pynroi hapoh jong ka dong ka thaiñ ki don beit ki jingpynwit hangne hangtai namar la hap ban shim ruh khyndiat ïa ki jaka jong ki ‘riew shimet.
Namarkata, u la buh ka jingkyrpad ïa ki paidbah ba kim dei ban don ka jingkhim mynsiem hynrei ki dei ban long kiba sbun bad kylluid ban ailad ïa ka roi ka par ba kan wan khnang ba kan long ka jingmyntoi ym tang ïa uwei ne ar ngut hynrei ka jingmyntoi lang jong baroh ki paidbah. U la ong ruh ba ka jingplie ïa u mawnongrim ban tei ïa ka ophis ba thymmai jong u BDO kam dei ka jingïoh nong ïa u BDO marwei ne ïa ki nongtrei ne wat ïa u nongmhkhmat hynrei kan long ka jingmyntoi bad ka jingïoh-nong ïa ka bynta u paidbah jong ka konstitwensi bad ïa ki shnong ki thaw kiba leit donkam.
U la khot la wer ïa ki paidbah jong ka dong ka thaiñ ba lada wan kino kino ki kam pynroi hapoh jong ka konstitwensi ki dei ban long kiba ïatreilang ha ki liang baroh khnang ba kan nym don kano kano ka jingdkhot ha ki jingtreikam. Ha kajuh ka por u la kyrpad ruh ïa u nongpyntrei ba u dei ban trei ha ka rukom kaba dei ym ban shu trei tang dep rukom hynrei u dei ban trei katkum ba la mang bad ban pyndep ha ka por kaba biang.
U Block Development Officer ka Ranikor C&RD Block, u bah A.L. Bareh, MCS ha ka jingkren jong u u la ïathuh ba kane ka Ranikor C&RD Block ka la don mynta ha ka jingïaid lynti kaba 30 snem ei ei bad ma u u la long kum u BDO uba 15 napdeng ki BDO kiba la ïoh ban pyntyllun ïa ki kam. Ha kaba ïa dei ba ka jingtei kaba thymmai, u bah Bareh u la ïathuh ba ka dei ka jingmang pisa lyngba ka Ministry jong ka C&RD jong ka Sorkar India kaba la mang haduh 2 klur tam bad ban shna ha ka jaka kaba don 680 sq meter.
Namarkata, u la pynshai ruh ba ka ophis u BDO ka dei kata ka rynsan ban don ka jingïatreilang jong ka sorkar ryngkat u paidbah ha ka ban pyntyllun ïa ki kam kiba bun la ka long ha ka roi ka par, ki jingïarap ïa ki briew kiba donkam bad kiwei de ki lad pynroi.
U bah D. Kyndiah, SDO ka PWD (Roads) Nonghyllam Division, u bah B.R. Dkhar, SDO ka PWD (Roads) Ranikor Division, u Block Development Officer ka Ranikor C&RD Block, u bah A.L. Bareh, MCS lem bad kiwei ki la ïadonlang ha kane ka sngi.
La pynshit pynshngaiñ ïa kane ka prokram da ka jingshad na ka Rajai A, na ka Village Organisation Thangrai-Nongnah.
Kiwei pat kiba la ai jingkren ki long u bah K.C. Nongrum, Executive Engineer ka PWD (Roads) jong ka Ranikor Division, u bah T. Shyne, APO ka Ranikor C&RD Block u la pynïaid ïa ka jingïalang, u bah P. Lyngdoh, APO Ranikor uba la ai ka jingkren pdiang bad u bah L. Parïong, BPM, NRLM jong ka Ranikor C&RD Block u la ai ka jingkren khublei.

Leave A Reply

Your email address will not be published.