Pynhap pyrda u MLA ka Nongpoh ïa ka 1st (L) Dr. Jerin Syiem Memorial FT ha Umden

0

Nongpoh, Kyllalyngkot 04: Haka jingïakhun phainal jong ka lympung 1st Dr. Jerin Syiem Memorial Football Tournament, ka kynhun jong ka Umphing Thymmai Sports Club kala rah syndon ïaka nam lahduh hadien ba katei ka kynhun ka la lah ban pynliem noh ïaka Umshaken Sports Club da 2-1 kol haka jingïakhun phainal kaba la long hynnin ka sngi madan ïalehkai ka shnong Umden.
Kum ban shu kdew hangne ïa katei ka lympung ïalehkai phutbol kaba la pynlong ha madan Umden ka long kum shi bynta ban pynneh pynsah ïa u synñiang u bynhei jong u Late Dr. Jerin Syiem u ba la khlad noh naka ka sla pyrthei 2 snem mynshwa, u ba dei ruh u kpa jong u Bah Mayral Born Syiem MLA ka Nongpoh Constiteuncy, bad udei uwei naki rangbah u ba la don bynta ban nyhsynñiang shibun ki kam haka imlang ka sahlang, u Late Dr. jerin Syiem u dei ruh u Doctor sumar briew u ba la bat teng ïaka kam kum u District Medical Health Officer ha Ri-bhoi District, bad u la dei ruh uwei na ki Doctor ba la don bynta ban pynduh jait ïaka jingpang Ñianglyngkut haka thaiñ Ri-Bhoi.
Ïa katei ka lympung ïalehkai ban kynmaw burom ïaka ki kam ba ratbah jong une u Rangbah la wan ban pynhap pyrda noh da u khun jong u, u Bah Mayralborn Syiem MLA ka Nongpoh, kum u kongsan haka jingdon lang da u Bah Balajied Rani MDC ka Nongpoh, Bah Marchborn Syiem u ba dei u khun jong u (L) Dr. Jerin Syiem, u bah Benedick Maiong, bah Tobias Syngkli president jong ka Umden Sports Club Bad kiwei kiwei ki riew rangbah jong katei ka thaiñ, bad kumba 32 tylli ki club na kylleng ki jaka kila wan ban shim bynta ha katei ka lympung.
Haba kren ha katei ka sngi naka liang u Bah Mayral Born Syiem MLA ka Nongpoh u la pynpaw ba katei ka lympung ka dei kum ka jingkynmaw burom ïa u (L) Dr. Jerin Syiem u ba dei u kpa jong u halor shibun ki kam kiba u la noh synñiang sha ka imlang ka sahlang, bad lyngba katei ka lympung kan long ruh ka rynsan ïaki khun samla ba kin ioh ban shim bynta ban sei ïala ki jong ki sap ki phong haki kam ïalehkai phutbol kaba dei kawei naki jait jinglehkai ba paw haka pyrthei.
U la sneng la kyntu ruh ïaki khun samla ha katei ka sngi ba ki dei ban pyndonkam hok ïaka sap kaba ki don namar ka kam ïalehkai ha kine ki sngi kala dei kawei naki lad kamai bad iohkam iohjam lada ki khun samla ki pyndonkam hok ïaka sap bad khamtam ban kiar naki jingmlien bad ki jingdih basniew kum ka kyiad, u drok bad kiwei kiwei.
La sam ruh ïaki khusnam ha katei ka sngi ha kaba ka Umphing Thymmai Sports Club kala ioh ban khur ïaka song pisa kaba T.30 hajar lem bad ka trophy bad ka Umshaken Sports Club kala ioh ban khur T.20 hajar lem bad ka trophy.

Leave A Reply

Your email address will not be published.