Nongstoiñ, K’lyngkot 4: Ka shnong Nongjri kaba hap ha ka Mawshynrut Civil Sub Division, tang kumba 19 kilomitar ei ei na Riangdo kaba don harud ka surok Riangdo-Bamil bad harud katei ka surok ka don kawei ka Aganwadi Centre jong ka shnong. Hynrei ha ka jingleit jurip jong u nongthoh khubor ïa katei ka thaiñ, la lap ba katei ka centre kaba dei ka jaka na ka bynta ban hikai ïa ki khynnah rit, ka la jot rathai, ki jingkhang kim don shuh bad hapoh kamra lei lei la dap tang ki jakhlia suda.
Haba ïakren bad u bah Phrangsngi Tyrsa secretary jong ka shnong, ha kaba la ïadon lang ruh da ka longkmie kaba dei ka Aganwadi, ki la ong ba ha ka jingshisha ïa baroh ki jait jingbam ba la wan sam da ki nongtrei jong ka ICDS, la dei ban buh ha katei ka centre khnang ba ka nongshet bad ka Aganwadi kin suk ban sam sha ki khynnah rit. Hynrei namar ba ka la jot rathai bad kam don shuh wat tang ka jingkhang ruh, kumta la hap ban buh noh ha ka ïing dorbar jong ka shnong kaba don syndah ha katei ka jaka.
Ha kaba ïadei bad ka jingjot jong katei ka centre, u bah Tyrsa u la ong ba la bunsien ki rangbah shnong bad ka Aganwadi ki la leit ban wad jingïarap na ka sorkar. Hynrei ki shu kular da kaba ong kin sa leh ïa kaba don kam hynrei haduh mynta ka jingkular kam shym la urlong. Nalor kata u la ong ruh ba la arsien arwat u la thoh da ka jingthoh sha u MLA ka Mawshynrut hynrei um patiaw satia.
U bah Tyrsa u la ong ruh ba ka jingbym pynsngap jong ka sorkar ban phah maramot ïa katei ka Aganwadi centre, ka la kylla long pynban kum ka jaka rieh slap jong ki blang ki masi bad ka kylla long ruh kum ka ktem rieh tngen jong ki riew sniew, kaba buh ïa ki khynnah khunlung kiba ïaid kai ha ka jingsyier.
U la ong ba ka jingbym don shuh ki shawkad bad ki jingkhang, ka pynlehraiñ ïa ki paitbah nongshong shnong bad ka wanrah ïa ka jingduh kaba khraw ïa ki khynnah rit kiba dang hap ha ka kyrdan pre primary. Namar, katei ka centre ka dei kum ka shlem ban hikai ba kin ithuh ïa u ABKD bad 123 ter ter. Nalor kata ka jingbym patiaw jong ka sorkar ka long thik kumba ka I beiñ ïa ki khynnah rit jong ka shnong Nongjri baroh kawei, u la ong.
