Shilong, Lber 29: Da kaba pyni ïa ka jingkiew kaba khraw ha ka jingpynroi ïa ki lad pule puthi, ka Indus Towers Limited, kawei na ki kompeni ba heh tam ha ka pyrthei, ha ka jingïatreilang bad ka Northeast Centre for Equity Action on Integrated Development (NEAID), ka la plie ïa ki paiñkhana kiba la pynkhreh bha bad kiba khuid na ka bynta ki khynnah kynthei na lai tylli ki sorkar skul jong ka thaiñ Ri-Bhoi bad East Khasi Hills. Haba ïaroh ïa ka Swachh Bharat Abhiyan jong ka Sorkar India, ïa ka jingbei tyngka ïa ki jingtei pynkhuid ba la shna thymmai ha ka Umden Umroi RMSA Secondary School, la ai jingkyrkhu da u Myntri ba donburom jong ka tnad Animal Husbandry bad Veterinary; U Bah Alexander Laloo Hek, MLA ba donburom jong ka Umroi konstitwensi, Damanbait Lamare, Special Project Director ka SSA; Swapnil Tembe IAS bad u Rajender Singh Gurung, Circle CEO-NESA jong ka Indus Towers Ltd.
Kane ka jingthmu ka long shi bynta jong ka Corporate Social Responsibility prokram, ka Pragati ka ba kongsan jong ka Indus Towers. Ka jingthmu ka long ban pynbiang ïa ki jaka pynkhuid kiba shngaiñ, da kaba pynbha ïa ka koit ka khiah bad ka jingkhuid jingsuba, ban pynroi ïa ka mariang kaba biang na ka bynta ka jingpule.
U Myntri ba donburom jong ka tnad Animal Husbandry bad Veterinary, U Bah Alexander Laloo Hek, u la kynthoh, “Kane ka jingthmu ka dei ka sienjam kaba kongsan ban kyntiew ïa ka jingkhuid jingsuba, ka burom, bad ka jingbha jingmiat baroh kawei jong ki khun kynthei jong ngi, kiba ju ïakynduh jingeh namar ka jingbym biang ki jaka pynkhuid ha ki skul. Nga ïaroh ïa ka Indus Towers na ka bynta ka jingpyrshang ba dei ban ai jingïaroh ha kaba pynlong ïa kane kaba lah bad pynshlur ïa ka jingïatreilang kaba dang ïaid shakhmat ban pynïar ïa kum kine ki jingpynbha sha kiwei pat ki thaiñ jong ka Meghalaya.”
Ka projek ka ïadei bad ar tylli ki bynta kiba kongsan jong ka jingpule jong ki khynnah kynthei – ki jingtei bad ka jingpynsngewthuh (infrastructure and awareness). Nalor ka jingshna ïa ki paiñkhana kiba khuid, ka prokram ka kynthup ïa ki jinghikai kiba bniah shaphang ka jingkhuid jingsuba ha ka por ba wan bnai, kiba la shna khnang ban pynpra ïa ki jingkhang ha ka imlang sahlang bad ban pynkupbor ïa ki samla pule da ki jingtip kiba kongsan shaphang ka koit ka khiah.
U Rajender Singh Gurung, Circle Chief Executive Officer (CEO) jong ka Indus Towers Limited u la pynpaw ïa ka jingshimkhia jong ka kompeni ban kyntiew ïa ka roi ka par: “Lyngba ka prokram CSR ba kongsan jong ka Indus Towers ‘Pragati’, ngi thmu ban weng ïa ki jingduna ba kongsan ha ki jingtei bad ban pynkupbor ïa ki shnong ki thaw. Nalor tang ki jingtei, kane ka jingthmu ka wad ban pynkupbor ïa ki samla pule da ka burom, ka jingshaniah, bad ka jaka kaba shngaiñ. Da kaba pynthikna ïa ka mariang kaba khuid bad kaba shngaiñ, ngi ïaleh ban pynroi ïa ka jingsngewrit hapdeng ki samla pule katba ngi dang tei ïa ka rukom sumar kaba pura hapoh ki skul, kaba ai jingmyntoi ha kaba kut ïa ka imlang sahlang baroh kawei.”
