Plie pyrda u ADC ïa ka EJHD-Level Inter School Athletic Meet 2025, ïashimbynta palat 600 ngut

Khliehriat, ïaiong 30: U ADC ka East Jaiñtia Hills District, u S.R.Marak mynta ka sngi u la plie pyrda ïa ka East Jaiñtia Hills District Inter School Athletic Meet 2025 ba la pynlong ha madan Teilang Playground ha Dkhiah West.
Ha kane ka lympung Athletic Meet 2025 jong ka East Jaiñtia Hills District ki la don haduh ar phew lai tylli ki skul kiba la wan ban ïa shim bynta bad ki don haduh hynriew spah tam ki khynnah kiba ïa shimbynta ha ki jingïalehkai bapher bapher.
Ha ka sngi plie pyrda kiba la don ryngkat ki kynthup u Additional Superintendent of Police, u bah S.Pasleiñ, ka District Sports Officer East Jaiñtia Hills District, ka kong Stephanie.M.Rapsang, District Public Relation Officer East Jaiñtia Hills District, u bah E.S.War lem bad ki nongkitkam jong ka Swimming Association, East Jaiñtia Hills Football Association bad kiwei kiwei.
Ka DSO EJHD, ka kong Staphanie Rapsang ka la ong ba ka East Jaiñtia Hills District ha ki snem ba la leit ka duna tang khyndiat eh ban ïoh rah ïa ka nam lahduh ha ka Athletic bad ka khmihlynti ba kan sa don ka por ba ka District kan ïoh ban rah ïa ka trophy kum ka champion ha ka Athletic.
Ka kong Rapsang ka la ïathuh ruh ba mynta ha ka Under 14 ka la don lai kynhun, A,B bad C bad yn sa nang kham bun ki jingïalehkai sports, la ong ruh ba ïa kaba kum kane ka Level Inter School Athletic Meet la ju pynlong ha kane ka madan Teilang Playground kaba long trai da i bah Teilang Phawa ba na shnong Dkhiah kaba ka jingheh ka long heh 200 mitar.
Shuh shuh hashwa ban sdang u samla Rishanmeki Ryngkhlem, u la shim ïa ka pledge bad jingkular ban kyntiew ïa ka mynsiem ialehkai.
Ki khynnah kiba shim bynta ha ki jait jingialehkai bapher bapher ki dei kiba hapoh ka 16 snem kyrta ne Under-16 (Shynrang) bad kiba hapoh 18 snem kynthei.
Ha ka Shot Put (Under-16) shynrang, u Nightiful Sukhlaiñ uba na Khliehriat Presbyterian Secondary School, u la ïoh khur ia ka takma ksiar (gold medal), u Arwinki Rymbai na Wapung Higher Secondary School u la ioh ïa ka takma rupa bad u Mutskhem Sari, na Seiñ Jait Tuber Higher Secondary School u rah ïa ka takma rnong (bronze medal)
Ha ka thup jong ka Under-18, u Vincent Chyrmang, na Wapung Higher Secondary School u la rah ïa ka takma ksiar, u Ram Lyngdoh, na Sein Jait Tuber Higher Secondary School, u khur ïa ka takma rupa bad u Edyson Dkhar, na Cham Cham Secondary School, u khur ïa ka takma rnong.
Ha ka High Jump jong ki khynnah shynrang, Under-18, u Kynsai Rymbai, uba na K.B. Memorial Secondary School, u la jop ïa ka takma ksiar, u Heimonmi Dkhar, na San Shnong Secondary School ïa ka takma rupa bad u Daoshwa Dkhar, na Wapung Higher Secondary Schoo ïa ka takma rnong.
Ha ka Long Jump, jong ki khynnah kynthei ba hapoh 18 snem (Under-18), ka Fancy Meliorate Siangshai, na K.B Memorial Secondary School, ka la jop ïa ka takma ksiar, ka Olivia Bareh, na Ambrose Memorial Secondary School, ka khur ïa ka takma rupa bad ka Juh Phawa na Sein Raij Branch (Jalyah) ka khur ïa ka takma rnong.
Ha ka Javelin Throw jong ki kynthei Under-18, ka Eunikilalthangthari Ngamlai na Khliehriat Presbyterian Higher Secondary School ka la rah ïa ka takma ksiar, ka Sathi Phawa na San Shnong Secondary School, ka rah ïa ka takma rupa bad ka Tholinda Swer na Rymbai Government Secondary School ka rah ïa ka takma rnong.