Jowai, Ïaïong 30: Ka EJHDCA ka la lah ban khur ïa ka jingjop da 9 wiket ha ka jingïakhun pyrshah ïa ka WKHDCA haka lympung Under-16 Boys Inter District Cricket Tournament 2025 (Zone-1) kaba la long ha ka sngi Balang (30 tarik Ïaïong).
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission, kaba ha West Jaiñtia Hills District.
Lah ban kdew ba ka jingïakhun ha katei ka sngi kala long ka ba noh shilliang ha kaba ka EJHDCA kala pyndep ban beh ïa ka thong da kaba duh tang shi wiket.
ïa ka jingkynting pisa (toss) la jop da ka WKHDCA kaba la kam trai ban tied nyngkong. Hynrei ki nongtied jong ka WKHDCA kim lah ban ïalehkai bha namar ka jingtbit palat ki nongkawang ball jong ka EJHDCA, ha kaba ki la kyllon uwei hadien uwei bad dei tang u Ador Nongbri uba la kham seisoh da kaba kamai marwei 16 ron (khlem out) na ki 30 bol, bad baroh lang ki lah ban kynjoh tang 55 ron shuwa ban khyllem baroh 10 wiket ha ka ober kaba 19.2.
Haba phai sha ki nongkawang ball jong ka EJHDCA, u Generous Dkhar, ula long u ba seisoh bha da ka ba khur marwei haduh 5 wiket na ki 6.0 ober.
Haba shimti ban beh ïa ka thong, lai ngut ki nongtied jong ka EJHDCA kiba mih madan ki la lah ban pyndep bad kamai 58 ron tang ha ka overs kaba 6.2 bad duh tang uwei u wicket. U Wadkidamei Lapasam ula lamkhmat ha ka tied da kaba kamai marwei 22 ron (khlem out) na ki 20 bol, u Generous Dkhar ula noh synñiang 13 ron (not out) na ki 9 bol bad u Ithuhbha Dkhar ula tied 12 ron naki 9 bol.
Kane ka dei ka jingïalehkai ba khatduh jong baroh ar kynhun na ka Group-A, (Zone-1), ka EJHDCA kala jop ar sien na ki saw tylli ki jingïalehkai bad ka la wan ba ar ha ka Points Table. Ka WKHDCA pat ka khlem lah ban jop wat tang shisien ruh na baroh saw tylli ki jingïalehkai bad ka shong ha trai duh haka points Table
Ka jingïalehkai ha kane ka sngi Palei (01-05-2025) kan long hapdeng ka SCA ‘A’ pyrshah ïaka SWKHDCA naduh ka por 8 baje shiteng mynstep.
