Shillong, ïaïong 30: Ka Nongkseh Sports Social & Cultural Club (SS&CC) ka sngew sarong ban pynbna ïa ka jingseisoh ha ka ban soi ïa ki 12 ngut ki rangïalehkai ba thymmai ha ka por jong ka Inter-Club Transfer jong ka Shillong Sports Association (SSA) na ka bynta ka samoi ïalehkai First Division 2025 ka ban wan.
Ha kane ka jingkyntiap klob (transfer window), kaba la long naduh ka 21 haduh ka 30 tarik u ïaïong, la sakhi ba kane ka klob ka la ïoh ïa ki samla kiba shemphang bad ki rang ïalehkai ba la tbit bha, ha kaba kiba bun na ki kidei kiba la ïalehkai ha ka Shillong Premier League (SPL) bad ha ka I-League.
Napdeng ki nongïalehkai ba kongsan ki long u rangïalehkai ba pawkhmat jong ka Mawlai SC kaba la wan ba-ar ha ka SPL, kynthup ïa u Khrawkupar Jana, uba la thep 9 kol ha ka SPL jong ka samoi ba la dep bad 12 kol ha ka Meghalaya State League 2024.
U Baiaikara Swer, rangïalehkai pdeng (Midfielder) — , uba la thep 7 kol ha ka samoi ba ladep, u la ïasoh ryngkat bad katto katne ki rangapdien (defender) ba kynthup ïa u Fullmoon Mukhim, Wanboklang Lyngkhoi, bad u Banskhemlang Mawlong, kaba la nang pynkhlaiñ ïa ka bynta ba shadien jong ka klob.
Ka klob ka la wanrah ruh ïa u rangïalehkai pdeng ba dang samla u Vickey Sharma na ka Langsning FC bad u Amand Biswa na ka Sawmer SC.
Na ka Pohkseh SC, u rangïalehkai pdeng u Mickey Tynsong u la soi ïa ka jingïateh, bad ka jingkynthup ïa u Meban Wahlang jong ka Ryntih FC u rangïalehkai uba la shemphang bha na ki jingïakhun I-League Second Division qualifiers, kan pynkhlaiñ ïa ka jaka pdeng jong ka kynhun da ka jinglong nongïalam bad ka jingïohi jngai jong u kum u rangïalehkai pdeng.
Ka Nongkseh ka la nang pynkhlaiñ shuh shuh ïa ki rangap kol jong ka da kaba soi ïa u Guidle Syiemlieh na ka Shillong Lajong FC, kaba la jop ïa ka SPL.
Lehse kaba kham sngewtynnad ha ka jingsoi rangïalehkai jong ka Nongkseh SS&CC ka dei ka jingpynrung ïa u kapten barim ka Shillong Lajong uba la ïakhun ha ka I-League, u Hardy Cliff Nongbri.
Na ka liang jong u Hardy Cliff Nongbri u la pynpaw ba u sngewkmen ïa kane ka jingïakhun kaba thymmai bad u aiti pura ban ïarap ïa ka kynhun ban ïoh ban kiew sha ka Shillong Premier League.
Ka Nongkseh SS&CC ka la ïoh ban pynïasoh ruh ïa u rangïalehkai ba sha khmat u Kitboklang Pale na Lawsohtun SC uba la pawnam bha na ka bynta ka sap ïalehkai ba tbit jong u.
Hynrei ka klob ka dang bteng ban shañiah ha ka jingïalam jong u rangïalehkai ba shakhmat u Chesterpaul Lyngdoh, uba la noh synñiang 12 kol bad assist ha ka samoi ba la dep. Yn ïasoh bad u da ki hynñiew ngut kiwei pat ki nongïalehkai ba ka klob ka dang bat na ka samoi ba la dep.
Hadien ba ka la duh salit ban kiew kyrdan ha u snem ba la dep, ka klob ka don ka jingkyrmen ba kane ka kynhun kaba thymmai bad kaba la pynkhlaiñ kan pynpaw pyrthei ïa ka jingkhlaiñ jong ka ha ka First Division 2025.
Nalor kata, ka Nongkseh ka dang pynkhreh ban wanrah sa lai ngut ki nongïalehkai ba la soi—u Chanmitre Thma, u Shano Tariang bad u Pynbhalang Suting lyngba ka Centralized Registration System (CRS), namar ba mynta ki dang ïalehkai na ka bynta ki klob ha Kolkata bad Nagaland. La khmihlynti ba ka jingkyntiap klob jong ka CRS kan plie ha kaba sdang jong u bnai Jylliew.
La seng ïa ka Nongkseh SS&CC ha u snem 1969, bad ka dei kawei na ki klob ïalehkai phutbol kaba la rim bha ha nongbah Shillong. Ka Club ka la ïashim bynta barabor ha ki lympung lehkai jong ka SSA (League), bad ka la mad ha kajuh ka por ïa ki jingeh bad ki jingkiew ha kine ki snem. Ka la kiew kyrdan teng sha ka Super Division League (ba la tip mynta kum ka Shillong Premier League) ha u snem 2008.
