Plie pyrda ka HYC ïa ka ‘1st Tur Shaphrang (Knock Out) Tournament 2025’

SHILLONG, Jylliew 26: Kum shi bynta jong ka jingïasnohktilang ban rakhe ïa ka ‘International Day Against Drug Abuse and Illicit Trafficking’ ka Hynñiew Trep Youth Council (HYC) Mawlai Circle, ha ka 26 tarik Jylliew, 2025 ka la plie pyrda ïa ka lympung phutbol kaba la tip da ka 1st Tur Shaphrang (Knock Out) Tournament 2025 ha Madan Heh, Mawlai.
Ïa kane ka lympung kaba la pynlong kyrpang na ka bynta ki khynnah pule Secondary bad Higher Secondary School la wan plie pyrda da u Khrawkupar Syiemiong na ka Ka Sur Jingkyrmen Society, kum u Kongsan haka jingïadon lang ki dkhot nongïalam bad ki nongkitkam jong ka HYC.
Shuwa ban pynbna ban sdang ïa ka lympung la ïoh ban pynlong ïa ka prokram kaba lyngkot ryngkat ka phang kaba ong “Say No to Drugs, Yes to Football” kaba mut “Ong em ïa u drok, Ho-oid ia ka phutbol”. Ia kane ka jingïalang la pynïaid da u Bah Drallingstar Iawphñiaw Sports Secratary HYC.
La ïoh ka jingkren lyngkot na u Bah Rhemdor G Saibon General Secretary jong ka HYC Mawlai, nangta na ka Kong Mitsi Nongrum – Councellor jong ka Meghalaya Aids Control Society [MACS] bad khatduh na u Bah Khrawkupar Syiemiong ha kaba ïadei bad ka jingktah jong u Drok ïa ka imlang ka sahlang bad ruh kumno ban lait na une u jingdih uba sniew.
Haba ai jingkren kum u Kongsan u Bah Khrawkupar Syiemiong u la ïasam ïa kaei kaba u la mad ha ka jingim jong u ba u drok ym tang ba u pynjot ïa u nongdih shimet hynrei ka pynlehraiñ bad pynsngewsih ruh ïa kiba haïing hasem khamtam ïa ki kmie ki kpa.
U la ong ruh ba ka jyllei ki briew kiba la kyrni ha u Drok ka dei ka dawbah dawsan kaba la nang pynkharoi bad pynjur ïa ki kam sniew, ki kam lute namar ki samla kiba la ngop ha une u jingdih kim salia shuh ban sdang sa ka kam tuh tang na ka bynta ban ïoh ïa ka bai dih.
“Ban lait na une (drok), Ngi donkam ïa ka jingsumar kaba paka, kaba kongsan tam ka dei ka Councelling khnang ban pynsngewthuh ïa ki samla ba kin lait na une u jingdih uba sniew,” la ong u Bah Khrawkupar Syiemiong, da kaba bynrap ba ka dei ka kamram jong Ngi ki paidbah ban ïada khnang ban pynduhjait ïa u drok.
Kumjuh na ka liang jong ka Kong Mitsi Nongrum – Councellor jong ka MACS ka la sam ïa ka jingpynsngewthuh paidbah ha kaba ïadei bad ka jingpang HIV ba kumno ka don ka jingïadei kaba jan bad u Drok namar ki don shibun kiba ïoh kem ïa kane ka jingpang lyngba ki thyrñia ba ki pyndonkam.
Ka la pynpaw ruh ba ka jingkheiñ jong ki briew kiba la ïoh ïa une u jingpang ka la jur bha ha Meghalaya bad lehse kane ka dei ban long na ka daw ba ki samla kim ju shimkhia ban phah test ïalade.
Ka la pynkut da kaba kyntu ïa ki samla shynrang bad kynthei ba kim dei ban ap haduh da paw ki dak ki shin hynrei kidei ban shim ïa ka jingkitkhlieh dalade ban phah test khamtam kito ki samla kiba la ngop ha u drok bad ba kin kiar noh shi syndon na une u jingdih uba sniew.
Ha kane ka lympung ki kynhun kiba ïashimbynta ki don haduh 13 tylli. Kine ki kynthup ïa ka Seng Samla Mawlai Phudmuri, Mawkhar Christian Higher Secondary School, Para Mangi, Playfit, Flying Squirrel, Shillong Polytechnic, Seng Khasi Morning School, OM Roy School, Pay For Rights 1, Pay For Rights 2, Bro’s FC, Mawsahew bad ka Shillong College.
Ka jingïalehkai kaba nyngkong ka la long hapdeng ka Seng Samla Mawlai Phudmuri pyrshah ïa ka Mawkhar Christian HSS, ha kaba ka Seng Samla Mawlai Phudmuri ka la jam shakhmat sha ka Quarter final hadien ba ka la jop da 3-0 kol.