SHILLONG, Jylliew 26: Ka long ka khubor kaba sngewsih bad kaba kyndit ïa ka phutbol ha kaba u rangïalehkai pdeng jong ka Argentina, u Camilo Nuin, ula khlad noh ha ka por ba dang sumar bad phah puid ïa ka khohsiew ba mynsaw.
“Utei u rangïalehkai ba dang 18 snem ka rta u la ïalehkai na ka bynta ka San Telmo kaba ïakhun ha ka lympung second division naduh u snem 2022 hadien ba u la ïalehkai na ka Boca Juniors bad ka shlem ai jinghikai jong ka Independiente Youth.
ïa ka daw jong ka jingïap ym pat lah ban tip.
“Da ka jingsngewsih kaba khraw Ngi pynbna ïa ka jingkhlad noh jong u Camilo Ernesto Nuin, u rangïalehkai ha ka kynhun ba dang samla bad ka kynhun ba ar jong ka division jong Ngi, uba dang don hapdeng ka jingshah sumar mynta ka sngi,” la ong u San Telmo.
“Ka klob kan sangeh trei mynta ka sngi kum ka dak jong ka jingsngewsih.
“Ngi ïasoh bad ka ïing ka sem, ki paralok, bad ki para ba ïalehkai lang jong u ha kum kane ka por kaba sngewsih bad Ngi kloi ban don ryngkat ban noh jingïarap na ka bynta kano kano ka kam kaba ki lah ban donkam.”
U president jong ka synjuk ïalehkai phutbol jong ka Argentine Football Association (AFA) u Claudio Tapia u la thoh ha ka rynsan X da kaba ong: “Ka khubor kaba sngewsih bha kaba pynkhihwin ïa ka phutbol ha ka pyrthei baroh kawei.”
Ha ka kyrwoh, ka AFA, ka ong: “Ka Argentine Football Association, lyngba u President jong ka, u Claudio Tapia bad ka executive committee, ka pynpaw ïa ka jingsngewsih halor ka jingkhlad noh jong u Camilo Nuin bad ka pynpaw ïa ka jingsngewlem sha kiba haïing hasem jong utei u rangïalehkai.”
