Ha ka ïakop mareh pyrshah drug, jop u Dasaman Kyndait na ki shynrang ka Phyrnai Kyndait na ki kynthei

Jowai, Jylliew 26: Shibynta na ka ‘International Day Against Drug Abuse & Illicit Trafficking & Nasha Mukt Bharat Abhiyaan’, ka Ophis jong ka District Social Welfare Officer, West Jaiñtia Hills District, ha ryngkat ka jingïatreilang ki bor pynïaid District bad ka District Sports Officer, Jowai kila pynlong ïa ka jingïakop mareh “Run against Drug Abuse and Illicit Trafficking”.
Ïa kane ka jingïakop mareh la kaweh lama da u ma EHM Passah uba dei u Working President ka West Jaiñtia District Sports Association (WJDSA), kaba la sdang na Main Gate jong ka Kiang Nangbah Stadium bad ïaid lyngba ka surok bah Ladthadlaboh, Jowai Public School, Gate Polytechnic, Kshaid Rymphum, Salaroh, Surok Dulong Poh-hali, Dulong, Tpep-Pale, surok Wah Nangbah, New Hill National Highway bad wan phai biang sha ka jaka ba sdang.
Ha kane ka sngi la sam ïa ki khusnam da ki mementoes bad ka song pisa sha ki nongjop, ha ka kyrdan jong ki shynrang la wan ba nyngkong da u Dasaman Kyndait na Sabahmuswang, ïa ka nam ba ar la ïoh da u Daioohimitre Suting na Sohmynting bad ba lai da u Daboimiki Mulieh na Ialong.
Katba ha ka liang ki kynthei la ïoh ïa ka nam ba nyngkong da ka Phyrnai Kyndait na Mukhaialong, ka Marwa Shylla na Sabahmuswang ba wan ba ar bad ïa ka nam ba lai la ïoh da ka Dakawanhi Suchiang na Mihmyntdu. Baroh ki nongwan ïashim bynta kila pynpaw ka jingsngewkmen ban ïoh ïashim bynta ha kum kane ka jingïakop mareh.