Shillong, K’lyngkot 17 : Ha ka jingpynkut ïa ka jingwan ïuhkjat ba lai sngi jong ka sha Jylla, ka President ka Ri Droupadi Murmu mynta ka sngi Balang, ka la plie paidbah ïa ki motdur jong ki laingut ki khlawait ka Jylla-u Tirot Sing, U Kiang Nongbah bad u Pa Togan Sangma ha Raj Bhavan, Shillong.
ïa kine ki motdur la thaw bad shna da ka Riti Academy of Visual Arts.
ïa ka President la synran da u Lat ka Jylla Phagu Chauhan, u Myntri Rangbah ka Jylla Conrad K Sangma, ka Myntri ka Koit ka Khiah Kong Ampareen Lyngdoh lem bad ki Heh Ophisar bala ïalam da u Chief Secretary Bah DP Wahlang.
Haba plie ïa kine ki motdur, la ïathuh khana ruh ha ka President halor ka bynta jong kine ki khlawait ha ka jingïakhun pyrshah ïa ka jingsynshar ka Sorkar Bilat, kaba lam sha ka jingpha ïa la ka jingim na ka bynta ka Ri.
Shuwa ba kan mih na Shilllong, ka President ka la thung ruh ïa u dieng ha Raj Bhavan.
Ha ka sngi ba nyngkong ba ka wan ïuhkjat kata ha ka 15 tarik, ka President ka la plie pyrda ïa ka 5th Meghalaya Games ha Tura bad ha ka 16 tarik, ka la ai jingkren sha ki dkhot ki Self Help Group (SHG) ha Baljek Airport, Tura bad buh mawnongrim jong ka Integrated Administrative Complex ba thymmai.
Ha kane ka juh ka por, ka President ka la ai jingkren ha ka jingïalang ba long ha Mawphlang bad plie paidbah lyngba ka kor online ïa ka surok Rongjeng-Mangsang-Adokgre bad surok Mairang-Ranigodown-Azra nalor ka jingbuh mawnongrim ïa ka project Shillong Peak Ropeway bad ki jaka sah ki nongshangkai pyrthei ha Kongthong, Mawlyngot bad Kudengrim.
