Leit tih bniah ki nongthoh khubor na Meghalaya ïa ki skhim ka Sorkar Pdeng sha Bhubaneswar
Shillong, Kyllalyngkot, 17: Ka kynhun jong 10 ngut ki nongthoh khubor na Meghalaya ka la poi sha Bhubaneswar mynta ka sngi kum shi bynta ka Press Tour sha Odisha hapoh ka prokram Viksit Bharat Sankalp Yatra (VBSY). Ki ophisar ka PIB Bhubaneswar ki la pdiang burom ïa ki nongthoh khubor na Meghalaya haba ki la poi.
Ka jingthmu jong kane ka Press Tour ka dei ban plié lad ïa ki lad pathai khubor ba kin sngewthuh ïa ki jinglong jingman ha kaba ïadei bad ka jingseisoh ki skhim Sorkar Pdeng ha Odisha bad ba kin ïohi dalade ïa ka jingïaid shaphrang jong kine ki skhim ha ka jylla.
Kane ka jingleit ka thmu ruh ban pyni kumno ki kali Information, Education, Communication (IEC) kiba la phah hapoh ka VBSY kaba dang ïaid mynta ki ai jingtip ban pynthikna ka jingpynpoi pura ïa ki skhim Sorkar Pdeng ha ka jylla.
Ha kine ki saw sngi ba kin don ha Odisha, kane ka kynhun kan leit sha Netaji Birth Museum bad ka Maritime Museum. Ka kynhun kan leit ruh sha ICAR-Central Institute for Women in Agriculture (ICAR-CIWA), ka jaka kaba nyngkong ha India kaba peit kyrpang ïa ka jingwad bniah kaba ïadei bad ki kam rep ïa ki longkmie.
Ka kynhun kan leit ruh sha CSIR – Institute of Minerals and Materials Technology Council of Scientific and Industrial Research (CSIR), Bhubaneswar kaba pynlong ïa ki jingwad bniah bad ki prokram kiba ïadei bad ka teknoloji ha ki kam bapher bapher ban pynbeit ïa ki jingeh ha ka jingwad bniah ha ki kam tih mar poh khyndew, ki mar poh khyndew bad ki kam kiba ïadei bad ki nar ban pynthikna ïa ka roi ka par jong ki kaba ïaineh.
Ha ryngkat kine, kane ka kynhun ki nongthoh khubor kan leit ïakren bad ki briew kiba ïoh jingmyntoi na ki skhim Sorkar Pdeng bapher bapher ha Odisha haba ki leit sha ki jaka bapher bapher ba pynlong ïa ka Viksit Bharat Sankalp Yatra. Ka kynhun kan leit ruh sha Dhauligiri bad ka Konark Sun Temple
Ïa kane ka Press Tour la pynlong da ka Press Information Bureau, Shillong ha ka jingïatreilang bad ka Press Information Bureau, Bhubaneswar hapoh ka jingpeit jong ka tnat Information & Broadcasting, Sorkar India.