Leh burom ka Seiñ Raij Tuber ïa ka lyngkhuh sngi ïap ba 355 snem u Woh Tep Kyndait

Khliehriat, Kyllalyngkot, 17: U Symbud Myntri Rangbah ka jylla Bah Sñiawbhalang Dhar ha ka sngi Balang u la plie paidbah ïa u durmot jong uwei na ki khlawait ka rilum Jaiñtia u Woh Tep Kyndiat ba la pynieng hajan u mot ba la tei nam ïa u ha shnong Tuber Kmai shnong, East Jaiñtia Hills District.
Ka Seiñ Raij Tuber kum ka dak ka jingpyndonburom ka la kynmaw burom ïa ka lyngkhuh sngi ïap kaba 355 snem jong u Woh Tep Kyndait uba la shah pyniap ha u Syiem ka Jaiñtia Pur ha Syllhet, ha ka 17 tarik, ïaïong, 1669 bad ka dawbah ka jingshah pyniap jong une u riewkhraw ka dei na ka daw ka jingshah pynbor ha u Syiem Jaintiapur ba dei ban ai jait sha u kpa bad kiwei kiwei ki dawbah kiba ktah mationg ïa ka jaitbynriew.
U Woh Tep u pyrshah jur haduh katta katta ïa ka jingthmu u Syiem Jaiñtiapur khamtam eh ban shim jait na u kpa. La ong ruh ba u Woh Tep u dei ruh u briew uba ieid ïa la ka jait ka kynja, ïa ka ri bad ka jaitbynriew, uba angnud ruh ban pynneh pynsah ïa ki riti ki dustur jong ki menbarim, u don ruh ka mynsiem shynrang.
Ha kane ka sngi ïa ka khanatang kaba bniah shaphang une u riewshlur la pynsngew da u Adviser jong ka Seiñ Raij Tuber u Bah Helping Phawa.
Ha ka jingkynmaw burom ïa ka lyngkhuh sngi iap jong u Woh Tep, la buh syntiew ha u durmot jong u Woh Tep Kyndait da ki Seiñ Kur Kyndait, ki nongïalam ka Khasi Students Union (KSU) East Jaiñtia Hills Distroct ba la lam khmat da u President u Bah Streamly S.Suchen, ka Seiñ Raij Tuber bad na kiwei kiwei ki kynhun bad ki Raij.
Haba kren kum u kongsan u Bah Sñiawbhalang Dhar u la pynpaw ia ka jingsngewkmen ba ka Seiñ Raij Tuber ka la buh ïa ki dak sah jingkynmaw ïa une u riewkhraw da kaba tei ia u mot uba don haduh lai mala bad u mot dur jong u khlawait.
U la ong ba u Symbud Myntri Rangbah ryngkat bad u MLA ka Khliehriat Constituency Bah Kyrmen Shylla uba dei ruh u Myntri ka Sorkar Jylla kin sa ïa pyrshang ban kyntiew shuh shuh ïa kane ka jaka ban pynlong ruh kum ka jaka jngohkai pyrthei.
“Kum ki khun jong ka Seiñ Raij Tuber, haba dang lah ban kynmaw ïa kano kano kaba dei jong ka mynnor, la khmihlynti ba ka Raij jong phi kan nang kiew shaphrang ha ki liang baroh. Ai ba u Blei Trai Kynrad un nang kyrkhu kyrdoh ïa ka Seiñ Raij Tuber,” la ong u Bah Dhar.
“Kum ki kmie ki kpa, ki Ma ki Woh kano kano kaba ym lah ban leh ki khmihlynti ba ki khun kin pyndep bad pynurlong, kata ka ju dei ka jingangnud lada don kino kino kiba wanrah ïa ka nam ka burom ha shhnong ha thaw, ka Raij ka dei ka muluk, sngewthuh ba ha kito ki por ym don khulom ym don kot, don ki bynta ba ki don ki jingialeh da ka tari, da ka wait, hynrei ha kine ki sngi kam dei shuh kata ka juk ban long kumta, hynrei ka ktien ka thylliej, ka sneng ka kraw jong ka longshwa ai kan neh,” u la bynrap.
U Bah Kyrmen Shylla kum u symbud kongsan u la kyrpad ïa u Bah Sñiawbhalang Dhar ba un iarap shuh shuh ban pynioh da ka surok kaba bha ban leit sha ka Khlaw Blai lane ka khlaw kyntang kaba jngai kumba 2 kilomitar na ka surok National Highway Tuber khnang ban dup pynsuk ïa kiba wan jngohkai ïa kane ka jaka.
U la pynpaw ruh ba kum u Nongmihkhmat u don ka jingangnud ban pynneh pynsah ïa ki matti uba rim kiba don ha ka thaiñ. U la pynpaw ruh ka jingsngewkmen ba ka Raij Tuber ka la lah ban tei ïa u durmot jong u Woh Tep Kyndait kum ka jingpynsah ïa ka kyrteng, ka nam bad ka khana tang ïa ki riew shlur ka thaiñ.
La pynitynnad shuh shuh ïa ka prokram da ki jingshad tynrai na ki samla jong ka Seiñ Raij Tuber, ki jingshad kiba kit jingmut kiba pyni ïa ka riti ka dustur, ka lariti kaba donkam ban pynneh pynsah pateng la pateng,
Ha kane ka sngi, la don lang ruh u MLA jong ka Jowai Bah Wailadmiki Shylla, u Deputy Chief Executive Member ka JHADC Bah Lasky Rymbai, u EM ka JHADC Bah Lakhon Dkhar, u Deputy Commissioner ka East Jaiñtia Hills District Abhilash Baranwal, u Superintendent of Police Giri Prasad, u Doloi ka Elaka Jowai Ma Puramon Kynjing, u Doloi Elaka Shangpung Ma Chanki Langbang, u Secretary ka Seiñ Raij Tuber Ma Jolby Sana, u Vice President ka Seiñ Raij Tuber Ma Lukas Shylla bad ki khun ki hajar jong ka Seiñ Raij Tuber.