Shillong, Kyllalyngkot 17 : U Symbud Myntri Rangbah ka jylla uba dei peit ïa ka tnad kam pohïing u bah Prestone Tynsong u la ong mynta ka Sngi Balang ba ka sorkar jylla ka ïai bud dien bad kan dang ïai bud dien ia ki mat ba sahteng bad ka sorkar pdeng kata naduh ka Inner Line Permit (ILP) haduh ka jingpynrung ïa ka ktien Khasi bad Garo ha ka Khyrnit kaba phra jong ka Riti Synshar ka Ri India.
“ La ka dei hangne ne ha Delhi ngi ïai bud dien beit ïa kine ki mat ba sahteng da kaba ïakren bad u Myntri Rangbah duh ka ri u Narendra Modi bad u Myntri Kam pohïing ka ri u Amit Shah” ong u Symbud Myntri Rangbah.
ïa kane u la jubab haba kylli hato ka Kynhun Myntri kan pynkynmaw biang ne em ïa u Amit Shah halor ki mat ba sahteng ha ka jingwan jongu ba arsngi sha kane ka jylla. Namar u Amit Shah un wan ban pynïaid ia ka jingialang jongka North Eastern Council (NEC) ha State Convention Centre ha ka 19 tarik mynta u bnai.
“ Kumba long mynta ngim ïadon por namar dang mynta ka sngi ka President ka leit phai sha Delhi bad lashai ka sngi la wan sa u Myntri Kam Pohïing hapdeng ka por 3.30-4 baje janmiet. Kumta ngam tip la ngin don por ne em ban ïa kynduh kum ka Kynhun Myntri ban ïakren halor kane ka mat, lada ïoh lad ruh sa tang lashai hi ka sngi” ong biang u bah Prestone.
Halor ka jingbym biang ka jingpynïaid khamtam ïa ka bam ha ka Meghalaya Games, u Symbud Myntri Rangbah u la ong halor kane ka phang u myntri kam ïalehkai sport u la dep ban pynshai.
“ Lait noh tang ha ka Sngi Plie namar na ki daw ba hap ban pyrkhing ïa ka jingpahara namar ba wan plie da ka President ka jia ka jingslem ban pynpoi ïa ka bam hynrei hadien katei la dep pynbiang lut nadong shadong bad kam don shuh kano kano ka jingujor” ong u bah Prestone.
