Shillong, K’Lyngkot 17 : U Symbud Myntri Rangbah ka Jylla, Bah Prestone Tynsong ha ka sngi Balang u la khyrwit kylla ïa ka Voice of the People Party (VPP) halor ka jingdawa ban weng lut noh ïa baroh ki political appointee na ki board bad ki commission bapher bapher.
Haba kren bad ki lad pathai khubor u Symbud Myntri Rangbah u la ong, “Ka sorkar hashwa ba kan leh ïa kano kano ka da pyrkhat 100 sien la ka long naduh ka jingthung ïa ki political appointee lane wat ban weng ïa ki nongtrei kontrak (contractual) ha ki tnad sorkar.”
U Bah Prestone u ong ruh ba ki lah ban kren kumno kumno ne katba ki mon hynrei ka sorkar ka treikam katkum ki kyndon bad kumta ki hap bud ïa kata.
Lah ban kdew hangne, ka VPP lyngba u General Secretary ka Party Dr.Ricky AJ Syngkon u la phah da ka jingthoh sha u Myntri Rangbah ka Jylla ban dawa ba dei ban weng lut plaiñ ïa baroh ki political appointee ne ki nongïalam ki seng saiñ bad ki kyrtong ba shah rem election na ka kam Chairman, Co-chairman, Vice Chairman bad kiwei kiwei kiba ka sorkar ka la thung ha ki Board, ki Commission, Corporation bad kiwei kiwei ki tnad .
Ka VPP ka ong ruh ba ka jingthung ïa kine ki political appointee ka dei tang ka jingpynlut phut ïa ka pisa u paidbah ha ki kam bym ai jingmyntoi wat tang khyndiat ruh ïa ki paidbah ka jylla.
Ha kane ka shithi, u General Secretary ka VPP u Dr Ricky AJ Syngkon u la ong ba kane ka jingleh ka sorkar ka sorkar ka long ka kam pynlut phut bym phoida.
“Kine ki political appointee ki long tang u soh kthang ïa ki paidbah bad ka long ka jingpynlut phut ha ki kam bym phoida ïa ka pisa u paidbah namar kum ka sorkar ka la pheil ban ai ïa ka jingshakri kaba dei sha u paidbah,” u la ong.
“Kum ka party ngi dawa ba dei ban weng noh mardor ïa kine ki political appointees kiba ka sorkar ka la thung,” bynrap utei u heh VPP ha ka shithi sha u Myntri Rangbah.
