Phuh samrkhie ki paidbah mar ïa plie ïa ka surok kaba shna na ka jaka bym poi pyrkhat ban ïoh surok

Shillong, Lber 31 : Ki nongshong shnong kiba don ha ka thaiñ Lower Lumparing ter ter haduh Dhobi Ghat, Laban ki la phuh samrkhie lut hadien ba u MLA ka thain Bah Sanbor Shullai u la plie paidbah ïa ka surok shnong kaba la shna ha ka jaka kaba ym ju don satia kiba poi pyrkhat ba yn lah ban pynpoi surok.
Ïa kane ka surok kaba plie paidbah ha kane ka sngi la ai kyrteng da ka Tendro Ryntathiang Road ïa kaba la shna ha ka jingmang kaba la kot sha ka 4.72 klur tyngka.
Kane ka surok kadei kaba la sdang naduh ka jingkieng Kong Nora Hynniewta bad Bah Ekindro Diengdoh bad ka mih pat sha Dhobhi Ghat kaba don mar pyrshah bad u transformer jong ka MeECL ha Mawnei Lower Lumparing.
Shwa ban plie ïa kane ka surok ka la don shwa ka kñia ka khriam bad hadien kane u Bah Sanbor ula plie ïa kane ka surok ryngkat ka jingdonlang u MDC ka Laban u Bah Ricky Shullai, u Executive Engineer ka PWD (Roads) Shillong Central Division Bah S Lytep, u Rangbah Shnong ka Upper Lumparing u Bah HB Wahlang, u Rangbah Shnong ka Lower Lumparing u Bah D Shabong ba kiwei kiwei.
La donlang ruh ha kane ka sngi naduh ki nongïalam shnong ka thain Laban, ki bahaiing bahasem jong u Bah Tendro Ryntathiang bam kwai ha dwar u Blei bad ki paid nongshong shnong.
U Bah Sanbor Shullai haba ai jingkren ha kane ka sngi ula ai jingïaroh bad jingkhublei ïa ki paidbah khamtam eh ïa kito kiba la noh synniang ei ïa ka jaka ka jong ki ban ïoh shna ïa katei ka surok ban pynsuk ïa ka leit ka wan jong ki paidbah baroh.
“Ki paidba ka Shillong South constituency kim donkam satia ban leit shah thngan ha phyllaw Secretariat namar u Bah Sanbor u la pynbiang lut ïa ki jingdonkam jong phi,” ong u Bah Sanbor da kaba pynpaw ïa ka jingshah thngan jong kawei ka longkmie ha jan Secretariat tang na ka bynta ban shna noh ïa ka surok kaba la sniew bha ha Ri Bhoi.
Nangta u ong ruh ba kum u MLA un ym lah ban leh ei ei tang marwei hi lada ki paidbah nongshong shnong kim mih shakhmat ban kyrshan lan g ïa u la ka long ha kano kano ka bynta ruh.
“Kaba kham kongsan kadei eh ïa kito baroh kiba la ai sngewbha ïa ki jaka puta jong phi ban shna ïa kane ka surok. Kane kadei ka nuksa kaba bha ïa kiwei pat ïa ka jingkylluid mynsiem jongphi na ka bynta kiwei pat ba kin suk lang ha ka leit ka wan,” bynrap biang u Bah Sanbor.
Baroh ki nongkren ha kane ka sngi ki la ai ka jingïaroh ïa u Bah Sanbor uba la ïakhun tyngeh ban pynurlong ïa kane ka surok kaba ym ju don satia kiba poi pyrkhat ba kane ka sngi kan poi ba kin ïohi ïa ka surok kaba paka bad shna bha. Ki la ong ruh ba mynta kim donkam shuh ban ïaid kyllain na kawei pat ka surok namar ka la don kane ka surok thymmai kaba la pynjan bad pynsuk ïa ka leit ka wan la ka long da kaba ïaid kjat lane da ka kali ruh kumjuh.
Ha kajuh ka por, u Bah Sanbor u la ong ba mynta lei lei ba la donlang u Bah Ricky Shullai kum u MDC ka la nang pynsuk shuh shuh ïa ka jingshakri ïa ki paidbah ka thain.
U Bah Sanbor u la ong ruh ba ki dang bun kiwei pat ki projek kiba kum u nongmihkhmat un ïai bteng ban wanrah na ka bynta ka jingmyntoi jong ka thain baroh kawei.