Mar ïa dep jurip pyntip u Bah Hamlet ban siang rong thymmai noh ïa ki surok ha Lawsohtun

Shillong, Lber 31 : U Chief Adviser jong u Myntri Rangbah ka Jylla, Bah Hamlet Dohling ha ka step sngi Nyngkong u la leit ban jurip ïa shi lynter ka surok ha ka shnong Lawsohtun hadien ba ka la don ka jingud jingnam na ki nongshong shnong halor ka jingsniew palat ka surok ha katei ka thaiñ.
Ryngkat ka jingdonlang u Assistant Executive Engineer ka tnad PWD Bah N Lyngdoh nangta u Rangbah Shnong Bah Harribert Rynjah nalor ki riewrangbah, u Bah Hamlet u la leit ruh ban jurip ïa ka jingpyntrei ïa ka surok Umjasai kaba dang ïaid shaid shaid mynta.
Haba kren bad ki lad pathai khubor, u Bah Hamlet u la ïathuh, “Na ka liang ki nongïalam shnong, na ki nongshong shnong bad kumjuh na ka kynhun jong ki nongñiah taksi ki la wan ban kynduh bad kyrpad ïanga ban pyntip ba ka surok ha Lawsohtun ka la sniew shaba palat bad ka la ktah ïa ka leit ka wan jong ki nongshong shnong.”
U Bah Hamlet u la ïathuh ba ha ka jingwan jurip ki la ïohi ba kadei ka jingshisha. “Kumta na ka liang jongnga da ka jingpynbeit bad ki nongïalam shnong ngi la pynbeit ba ngin ym maramot tang ïa kaba sniew hynrei namar lada ngi leh kumta, tang shu slap kan sa sniew biang kumjuh bad kane kan wanrah shi wanrah ïa ka jingeh.”
U la ïathuh ruh ba namar ïa kane ka kam la dep ruh ban ïa kren bad u Symbud Myntri Rangbah ba dei peit ïa ka tnad PWD Bah Prestone Tynsong kumta ki la ïa pynbeit beit ban phah siang thymmai beit ha ka shnong hi baroh kawei.
“Ka kam hi kan sdang noh ha kine ki khyndiat sngi ban sa wan kumta nga kyrpad ïa ki nongshong shnong ba kin ïai shah lang bad ki kontraktor khnang ab ka kam kan long kaba ïaid beit,” bynrap biang u Bah Hamlet.
Ha kawei pat ka liang u Bah Hamlet uba dei ruh u MLA barim ka thain u la ïathuh ba hadien ka jingwan jurip ia ka surok ban leit sha Umjasai na Block 5, ka kam ka la ïaid shakhmat bad ki khmih lynti ba ïa kane ka surok yn sa lah ban pyndep noh ha u bnai Nailar mynta u snem. U ong ruh baki la ïohi ba kane ka surok ka long kaba pynnoh bha hynrei ki kontraktor pat ki la trei shaid shaid kumta u ong ba ynda la dep kane ka surok kan long ka jingkyrkhu kaba khraw ïa ki paidbah kiba sha ha ka dong Umjasai.
Na ka liang u Rangbah Shnong, Bah Harribert Rynjah pat u la pynpaw ia ka jingkmen kaba khraw bad ai ka jingïaroh ïa u Chief Adviser jong u Myntri Rangbah uba la shimkhia hi dalade ban wan jurip ïa kane ka surok bad ruh ban buddien tad haduh ban da ïoh ban phah shna thymmai noh ïa kane ka surok kaba ki nongshong shnong baroh ki la ïa ud lut namar ka jingthut ha ka leit ka wan kaba man ka sngi.