Nongstoiñ, K’lyngkot, 28: Ryngkat bad ka ri India baroh kawei, ka West Khasi Hills ka la rakhe ïa ka Republic Day kaba 75 snem jong ka ri da ka jingkmen, ka jingsarong bad ka jingieid.
Ka Dr Ampareen Lyngdoh Myntri ba dei khmih ïa ka tnad Agriculture, Health, and Family Welfare, Law Commission, IPR jong ka Sorkar Jylla, ka la long ka Kongsan, ha ka jingdon ryngkat lang jong u Bah Gabriel Wahlang, MLA MDC, Nongstoiñ Consti-tuency, Bah G.Momin MLA Rambrai Jyrngam Constituency, Bah. Garod L.S.N. Dykes IAS, Deputy Commissioner jong ka West Khasi Hills District, kiwei part ki shakri sorkar, ki nongshah khot sngewbha, ki riew pawkhmat jong ka dong ka thaiñ, ki skul, ki kolej bad ki paidbah na jngai bad najan jong ka thaiñ Nongstoiñ.
Ka Dr M.Ampareen Lyngdon, ka la pynher ïa ka lama lai rong jong ka Ri India bud sa da ka jingrwai lang ïa ka National Anthem. Ka la shim ruh ïa ka salute na ka bynta ka March Past jong ki 14 ki Contingent kaba kynthup ïa ki Pulit, ki Skul, Kolej, NCC, Scout & Guide kiba la pynkohnguh ïalade ban shim bynta ha kane ka sngi bad ban ai burom ïa la ka Ri.
Kiwei pat ki bynta kiba la pyndep ha kane ka sngi ki kynthup ïa ka jingpyni nam ïa ki Tableau na ki tnad Sorkar kiba pyni ïa ka jingriewspah jong ka West Khasi Hills District. Nangta ka ïakob kynjat bol hapdeng ka Nongstoiñ Football Association (Veteran) bad ka Officers Club Nongstoiñ, kaba pyni ïa ka mynsiem jong ka jinglong shi tylli bad ka mynsiem ieid ïalehkai jong ki paidbah.
Ka la don ruh ka jingsam ïa ki jingbam na ka bynta ki nongpang kiba thiah ha Civil Hospital, ki khynnah khun swet jong ka St. Peter’s Green Pasteur Orphanage, Pyndengrei, ki khynnah jong ka Rev. S. Wollington Children’s Home Nongpyndeng bad ki khynnah jong ka Shelter Homes for Boys and Girls, Nondeiñ.
La pynkut ïa kane ka sngi leh kmen Republic da ka jingpynhap noh ïa ka lama lai rong ka Ri India ha ka por 6 baje janmiet jong kane ka sngi. Ka jingrakhe Repulic Day kaba 75 jong ka Ri India hapoh Nongstoiñ, ka long ka sakhi ba kum ki nongshong shnong ki don ïa ka mynsiem jong ka jingïatylli, ka jingkohnguh bad ban aiti na ka bynta ka Ri.
Ha Mairang EWKHD, la rakhe ïa ka Republic Day kaba 75 jong ka Ri India da ka jingkmen, ha kaba ki briew najan bad na jngai jong ka thaiñ Mairang ki la wan rakhe lang ha madan ïalehkai Dom Mawlum, ha kaba u Bah Comingone Ymbon, Myntri ka sorkar Jylla uba dei khmih ïa ka Food Civil Supplies & Consumer Affairs Dept. Home (Civil Defence and Home Guards) Water Resources, Cooperation Department u la long u Kongsan.
Nalor jong u, la don ryngkatlang u Bah G. Kharmawphlang IAS, Deputy Commissioner EWKHD, Superintendent of Police EWKHD, Bah M.B. Syiem, MPS, kiwei pat ki nongtrei sorkar, ki nongshah khot sngewbha, ki riew pawkhmat jong ka dong ka thaiñ, ki skul, ki kolej bad ki briew napoh ka District.
Katba ha Mawshynrut Civil Sub Division pat, ïa kane kajuh ka jingrakhe Republic Day kaba 75 jong ka Ri India, la rakhe ha madan ïalehkai jong ka Shnong Riangdo ha kaba k Kong. Santa Mary Shylla, MLA, Saipung Sutnga Consti-tuency, ka la long ka kongsan, ha ka jingdon ryngkat lang jong u SDO, Civil Sub-Division, Maw-shynrut, Bah M.Challam, MCS, kiwei pat ki nongtrei sorkar, ki nongshah khot sngewbha.
