Mawkyrwat, K’lyngkot 28: Ryngkat shityllup ka Ri India, mynta ka sngi ka 26 tarik u Kyllalyngkot, 2024 la rakhe ïa ka jingdap 75 snem ka jingïoh Republic ha South West Khasi Hills District ha kaba u Ma Kyrmen Shylla, Myntri ka tnad Revenue & Disaster Department jong ka Sorkar Meghalaya u la pynher ïa ka Lama ka Ri bad shim ïa ka Rashtriya Salute jong ka kynhun parade kaba kynthup naduh ki pulit, ki NCC haduh ki khynnah skul ha ka jingrakhe ïa ka jingdap 75 snem jong ka Republic Day ha ka rukom kaba ishongkun ba la pynlong ha phyllaw Ïingskul jong ka Nativity Higher Secondary School, Mawkyrwat.
Lah ruh ban kdew ba kumba 6 tylli ki skul ki la ïashimbynta ha ka March Past bad 8 tylli ki departments ki la ïashimbynta ha ka jingïakop pyni ïa ki Tableau.
Ha ka March Past, ka Jingïaseng Kynthei Mawkyrwat Presbytery Higher Secondary School, Mawkyrwat ka la rah ïa ka khusnam nongjop bad bud da ka Little Star Higher Secondary School, Mawkyrwat ha ka kyrdan kaba ar bad ka Maharam Government Higher School, Mawkyrwat ha ka kyrdan kaba lai.
Ha ka Tableau Presentation, ka Public Health Engineering (PHE), Mawkyrwat Division ka la ïoh ïa ka kyrdan ba nyngkong, bud sa ka Election Department (DC’s Office), South West Khasi Hills District ha kaba ar bad ka Soil & Water Conservation Office ha ka kyrdan kaba lai.
Ha kaba ïadei bad ka Cultural Programme, ka Jawahar Navodaya Vidyalaya, South West Khasi Hills District bad ka Nativity Higher Secondary School, Mawkyrwat ki la ïashimbynta. Shuh shuh la ïoh ruh ban sam ïa ki khusnam sha ka Umjarian HWC-SC na ka bynta ka jingle bha ha ka Health & Wellness Centre (HWC), bad sha ka Shnong Nongbah Marshillong kum ka ‘Best Village Health Council’ hapoh ka South West Khasi Hills District
La pynshongshit shuh shuh ïa kane ka sngi da ka Cultural Programme, ka jingsam jingbam da ka Officers’ Club, Mawkyrwat sha ki khunswet jong ka Hope Orphanage.
Ha kane ka jingrakhe la wan ban ïa sakhi lang da ki nongtrei sorkar, ki khynnah skul ryngkat ki nongshong shnong jong ka Mawkyrwat C&RD Block.
RANIKOR: Ryngkat bad shityllup ka Ri, la rakhe mynta ka sngi ïa ka jingdap 75 snem ka jingïoh Republic ha Ranikor Civil Sub Division ha ka rukom kaba ishongkun ha kaba u bah Pius Marweñ, MLA ka Ranikor Constituency u la pynher ïa ka Lama bad shim ïa ka salute jong ki Parade Contingents kiba kynthup naduh ki Police haduh ki 6 tylli ki skul kiba don ha kane ka dong ka thaiñ ha ka jingïalang kaba la long ha madan Nolikata, Ranikor Civil Sub Division.
Ha kane ka sngi la pynlong ruh ïa ki Cultural Programme, ki jingïalehkai ïa ki khynnah bad kiwei de ryngkat ka jingsam ïa ki khusnam sha ki nongjop.
Ha ka March Past, ka Jingaiti Secondary School, Nonghyllam ka ïoh ha ka kyrdan ba nyngkong bad bud sa ka Nolikata Higher Secondary School ha kaba ar bad ka Indira Gandhi Secondary School, East Rangasora ha ka kyrdan kaba lai.
Nangta, ha ka Cultural programme, la ïoh ban sam ïa ki syrnod jong ka jingïashimbynta sha ka Saindur Village Organization jong ka Dirang bad ka Dondima Village Organization jong ka West Rangasora.
