Shillong, Risaw 24 : Ki nongïalam jong ka Khasi Hills District Council ki la phuhmat lut hadien ba u Lat ka Jylla u CH Vijayashankar u la shon ïa ka muhor ïa ki hynriew tylli ki aiñ-rew (Bill) ba kin treikam noh kum ka aiñ ba pura na bynta ban pynjanai shuh shuh ïa ka jingtreikam jong ka KHADC katkum ki kyndon jong ka Riti Synshar jong ka Ri.
Kine ki hynriew tylli ki aiñ-rew kidei kiba la mynjur da ka Iingdorbar Thawaiñ jong ka Council ha u snem ba la dep ïa kaba la phah pat da ka tnat District Council Affairs ka Sorkar Jylla sha ka ophis jong u Lat ka Jylla ban ïoh ïa ka muhor jong u.
Haba kren bad ki lad pathai khubor ha kane ka sngi Palei, u Chief Executive Member jong ka Council, Bah Pynïaid Sing Syiem u la ïathuh ba ki aiñ-rew kiba u Lat u la shon muhor ki kynthup ïa ka Khasi Hills Autonomous District (Administration of Elaka (2nd Amendment) Bill 2023, bad ruh ka Khasi Hills Autonomous District (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohiong Lyngdohship Bill 2023.
Nangta ka Khasi Hills Autonomous District (Regulation and Administration of Land Rules, 2023, ka United Khasi Jaintia Hills Distirct Fisheries (Amendment) Bill 2023, ka Khasi Hills Autonomous District (Khasi Social Custom of Lineage) Amement Bill, 2023 bad ka Khasi Hills Autonomous District (Trading by Non-Tribal) (Amendment) Rule, 2023.
Ha kane ka sngi na ka liang ka Executive Committee ka la phah ka jingai khublei ïa ka sorkar jylla lyngba ka tnad District Council Affairs bad khamtam eh ïa u Lat ka Jylla uba la ai ka jingmynjur ïa kitei ki Bill ban long aiñ.
La donlang ha kane ka sngi naduh u Deputy Chief Executive Member Bah Pynshngaiñ N Syiem, nangta kiwei ki EM ba kynthup ïa ka Kong Grace Kharpuri, Kong Macdalyne Sawkmie Mawlong bad ruh u Bah Alvin Sawkmie.
Na ka liang u CEM u ïathuh ruh ba ki dang don kiwei pat ki Bill kiba dang sahteng kiba kum ka EC kin dang ïai bteng ban buddien khnang ba kine ruh kin sa ïoh noh ïa ka muhor na u Lat.
