Shillong, Risaw 09: U Superintendent ki pulit pynïaid kali, u Dr. Hari Prasanth M.R., IPS, East Khasi Hills, Shillong ha kaba la ong ba u la ïoh ka jingujor ha ka 4 tarik, Risaw, 2026, ha Lumdiengiri PS ba kawei ka ar shaka ka Royal Enfield Hunter 350 (Graphite Grey) kaba don ïa u registration No. ML-05-AF-7596 kala shah tuh na Riatsamthiah Block-II.
Ha kaba ïadei bad katei, la dep ban register da ka mukotduma ha Lumdiengiri PS C/No. 136/2026 U/S 305(b) BNS bad ka jingtohkit ka dang ïaid shakhmat.
Ha ka por ba don ka jingtohkit bad jingdon ki sakhi sabut, la ong ba ha ka 7 tarik Risaw 2026, u Bah Shabamutlang Syiemlieh 23 snem, uba shong ba sah ha Mawpun, Golflink, Shillong u la shah kem.
Haba kylli jingkylli, u la ong ba u la donkti lang bad uwei ïa uba la tip kum u Bah Cornelius Mukhim 20 snem ka rta, ba shong ba sah ha Mawlai Mawroh, Shillong bad la kem ïa kine baroh ar ngut. Ha ka por ba kylli ïa ki, kila phla ba ïa kine ki ar shaka ba ki tuh, la shalan tuh sha Bangladesh.
Hynrei ka jingtohkit ka dang ïaid shakhmat na ka bynta ban ithuh bad tip ïa kiwei kiba donkti ha katei ka kam tuh bad ban lap ksai ïa ka jingdonkti kaba kham khraw.
