Shillong, K’lyngkot, 25: U Bah Batskhem Ryntathiang uba dei u MDC jong ka Mairang-Nongkhlaw Constituency ha ka Palei ryngkat bad ki spah ngut ki nongkyrshan u la pynïasoh sha ka National Peoples Party ha ka jingïalang kaba la long ha ka shnong Mairang.
Ïa u Bah Batskhem Ryntathiang la pdiang sngewbha da u State Working President jong ka NPP u Bah Hamletson Dohling ryngkat ka jingsakhi lang jong ka Kyrtong MP ka NPP na Shillong Seat ka Dr. M Ampareen Lyngdoh nalor kiwei kiwei de ki nongïalam ba hakhmat jong ka party.
Na ka liang u Bah Batskhem haba kren ha ka jingïalang u la ong ba um don ei ei ban kynthoh ïa ka Congress kaba la pynjop ïa u ha ka elekshon MDC ha ka samoi ba la dep. “Ngi sngewnguh ïa ki nongïalam bad ïa ka party kaba la pynjop ïanga kum u MDC ka Mairang constituency,” u la ong.
Nalorkata, u la ïathuh ruh ba ka jingpoi jong u sha ka NPP kadei da ka jingbteng jong u Myntri Rangbah bad Symbud Myntri Rangbah ban phone na ka por sha ka por ïa u ban wan ïasoh noh sha ka NPP.
Ha kane kajuh ka sngi ka NPP ka la pynskhem ruh ïa ki nongkitkam jong ka NPP Mairang Block hapoh ka jingïalam jong u Bah Bel Rani nangta la pynskhem ruh ïa ka Women’s Wing kumjuh ïa ka Youth Wing.
La donlang ruh ka President jong ka Women’s Wing, Kong Jasmine Lyngdoh, nangta Prof Don War, President ka NPYF Bah Kitborlang Nongrem, Bah Ransom Sutnga nalor kiwei kiwei.
