Nongstoiñ, K’lyngkot, 29: Ka elekshon ka la hajan bad u bah P.Thongni uwei na ki nongïalam paitbah ha ka thaiñ Nongtrai sepngi jong ka Mawshynrut Constituency, kaba kynthup ïa ka Nongjri bad ka Langdongdai G.S Circle, u la ong ba ka thaiñ Nongtrai sepngi ka don kumba saw hajar tam ki paitbah nongthep vote bad ka dei ruh ka thaiñ kaba ki nongshong shnong ki ïakhleh lang Khasi bad Garo. U la ong ruh ba u la pyrshang ban lum jingtip na man la ki shnong ha katei ka thaiñ bad kumba ka long mynta, ki paitbah ki la sdang ban phai khmat sha u kyrtong ka HSPDP u bah Methodius Dkhar.
U la ong ruh ba ka Congress haduh mynta kam pat pynbna kyrtong, hynrei lada ha kine ki sngi ban wan kan pynbna ruh, ha katei ka thaiñ te ka la shitom ba un dang lah ban khroh ïa ki paitbah nongthep vote, namar haduh mynta dei tang u kyrtong ka HSPDP bad u sitting MLA u bah Gigur Myrthong ka NPP, kiba la don ïa ki nongkyrshan bad ka jingïaleh ruh kan long beit hapdeng jong kitei ar ngut. Nalor kata u la ong ruh ba ha kane ka kynti kaba mynta, wat ki paralok Garo kiba shong ha katei ka thaiñ, ki la sdang ban phai khmat sha u kyrtong ka HSPDP.
