Shillong, Kyllalyngkot 29 : Ka Khun Hynniewtrep National Awakening Movement (KHNAM) kan ïakynduh lashai ka 30 tarik Kyllalyngkot 2023 na ka bynta ban shim rai halor ki kyrtong jongka na ka bynta ka election MLA 2023 ka ban long ha ka 27 tarik Rymphang 2023.
U Vice President ka KHNAM u bah Thomas Passah u la ïathuh ba hadien ba la dep bishar bniah bha ka party kan sa ai tiket sha ki kyrtong kiba pan tiket na ka.
U la ïathuh ba ka party ka la ïoh pdiang ïa ki aplikeshon na ki 9 ngut ki kyrtong . Kumta la shai ka sngi ka party kan ïa kynduh ban bishar bniah ïa kitei ki kyrtong shwa ba kan ai ïa ka rai ba khatduh.
Ka KHNAM ka dei kawei na ki party ba long kum ka Congress hi shwa ka election 2023 namar u MLA jongka na ka North Shillong Constituency u bah Adelbert Nongrum ula mih noh na kane ka party bad pynïasoh sha ka party kaba thymmai ka VPP.
