Phah tuklar mardor ka NPP halor ka jingshah thombor u pastor Bipin ha u MR ka Odisha

Shillong, K’Lyngkot 23: U National Working President ka National People Party (NPP) u James K Sangma u la phah ban tuklar mardor ha u Myntri Rangbah jong ka jylla Odisha, u Mohan Charan Majhi halor ka jingjia shah thombor ha ki paidbhur ha Dhenkanal pyrshah ïa u Pastor Bipin Bihari Naik.
Katkum ka shithi ba la phah ha ka 22 tarik mynta u bnai Kyllalyngkot u James K Sangma u la pynpaw ïa ka jingsngewkhia halor ka kaiphod jong ka jingjia kiba sngewkhia ha kaba u pastor u la shah shoh shah dar bad shah pynleh rain ha ki paidbah ha ka 4 tarik mynta u bnai.
“Kumba phi tip, ka bor jong ka India ka shong ha ki jinglong jong ka riti synshar jong ka, ha kaba ka jingngeit ka dei ka mat jong ka jingsngewthuh jong uwei pa uwei bad ïa ki jingïakynad la pynbeit lyngba ki lad ki lynti kiba ïadei bad ka aiñ” la ong u James ha ka shithi.
Shuh shuh u la ong, Ki jingjia kiba kum kine ha ka jylla kaba ka shong suk shong sain kum ka Odisha ka long kaba pynjah burom shibun ïa baroh ki nongshong shnong jong ka ri jong ngi bad khamtam eh ïa ki briew kiba don ka jingngeit Khristan kiba ngeit ban im ïa ka jingim kaba don burom.
U James u la kdew ruh, Ka jingthombor paidbah kan ym lah ban bujli ïa ka jingsynshar jong ka ain da kaba thmu ne thew ïa ka jingngeit bad ka pynsniew ïa ka jinglong jingman jong ka imlang sahlang kaba bun jait kaba donkam eh ha ka riti synshar jong ngi.Katba ïa ki jingshisha jong ka mukotduma, khlem artatien, yn sa bishar bniah da ki bor ba dei peit.
La leh ïa u Pastor Bipin Bihari Naik ka long kaba pynkhuslai bad kaba dei hok ban ioh ïa ka jingsumar kaba bniah.Ym lah ban ailad ïa ki kam leh donbor ban bujli ïa ka rukom trei kam kaba dei, namar ki don ha ka jingma ban pynmih ïa ka jingtieng bad jingbym shaniah hapdeng ki jaitbynriew, u la ong.
” Nga shaniah hapoh ka jingïalam jong phi bad kan pynthikna ba ka jylla Odisha kan ïai bteng ban pynneh ïa ka hok bad ka jingsynshar jong ka ain” u la ong.