Phah khang ïa ki dukan bar jylla bym don laisen, ha ka jingjurip u CEM bad ki EM ka KHADC ïa ka Iewduh

Shillong, Ïaïong 20: U Chief Executive Member (CEM) jong ka Khasi Hills Autonomous District Council (KHADC) u Bah Titosstarwell Chyne ha ryngkat ka Kong Grace Mary Kharpuri ka Executive Member (EM) ba dei peit ïa ka ïew bad u Bah Rangkynsai Kharbuki EM ba dei peit ïa ka tnad khaïi pateng ha ryngkat ka jingdonlang u Syiem ka Hima Mylliem Pa’iem Ainam Syiem bad ki Myntri ka Hima ha ka sngi Palei ki la leit ban jurip ïa ka ïewduh bad Them Ïew Mawlong ha kaba na ka liang u CEM ha ha kane ka jingjurip u la phah talasi ïa ki License Khaïi ki bar jylla bad hukum ban khang mardor ïa kiba ym don kot don sla.
Ha kane ka jingjurip ïa ki bynta ka Tehm Ïewmalong mar sien poi ha ka jaka ba ju don bha ki bar jylla ba die shana ha ki lynti ïaid kjat na ka liang u CEM u la phah talasi la ki biang kot biang sla ne em hynrei ynda la talai da ki pulit Enforcement la lap ba baroh kine ki mendie shana ym don ruh uwei uba don ka Trading license bad na ka liang u CEM u la hukum ban kyndang noh marmar.
Ha kane ka jingbthah la ïohi ba jan baroh ki dukan ki la kohnguh ïa ka jingbthah ki pulit Enforcement hynrei ynda la poi ha dukan ba la tip kum ka Kimlee Building ïa kaba la long trai da u Paul Leong u la pyneh triang ba un ym khang dukan satia namar ka don ka hukum ka Kashari ba ym dei ban khang ïa ki dukan ha katei ka jaka namar ka dang don ka mokotduma ha Kashari.
U Paul Leong u la ong ruh ba kane ka jingphah khang ka KHADC ïa ka dukan na ka daw ka jingbym don trading license ka la dei ka kam pynkheiñ ïa ka hukum ka Kashari ne Contempt of Court bad la ïohi ba ki ophisar ka KHADC ki la pyndem ñiuh mat tuiñ ïa ka jingpyni nia u Leong.
Kham hadien ïohi ba na ka liang uwei u ophisar ka KHADC u la wan ban kyrpad ïa u Paul Leong ban ai kopi lang sha ka ophis u CEM ïa ka hukum ka ïing bishar halor kata ka jingbym shah ban khang dukan lada kim don makan ïa ka Trading License bad ki la pyntip ruh ba u CEM u kwah ban ïa kynduh ha ka kamra treikam jong u bad khot ïa kynduh ïa u Leong ha ka sngi Thohdieng hynrei u Paul Leong u la ong ba um lait u CEM u hap ban ap ïa u ban wan ïakynduh pat haduh lashai ka sngi Thohdieng.
Haba kren sha ki lad pathai khubor hadein ba la dep jurip na ka liang u CEM u la ong ba ka jingwan jurip jong u ka long ban peit ïa ki jyntei da ki paki ïa ki basa kiba don ha Ïew die lang bad u ong ba ka jingïaid ka kam ka long kaba i hun
U la ong ruh ba ha kaba ïadei bad ka jingjyllei ki bar jylla ba shong die madan na ka liang jong u u la bthah ïa u Syiem bad ka Hima Mylliem ban lum jingkheiñ ïa ka jingdon ki bar jylla die madan bad ba aiti sha ka konsil hapoh shi taïew khnang ba ka Konsil kan sa leh ïa la ka bynta ban weng noh khamtam ïa kito bym don ki kot ki sla.
Shuh shuh u la ong ba na ka liang jong u un bthah ïa ki Enforcement ban wan jurip bad talasi laisen khaïi man la ka taïew khang ban teh lakam ïa ka jingjyllei ki nongdie madan khlem pynbiang ïa ki kot ki sla.