Mynjur ban tei ia u Dome thymmai bthah ka HPC ha ka IIT Roorkee bad Guwahati ban thew ïa ka jingtei

Shillong, ïaïong, 20: Ka High Powered Committee (HPC) jong ka Ïingdorbar Thawaiñ ka Jylla ka la ai jingmynjur ban tei da u tnum pyllun uba thymmai ha ka Ïingdorbar Thawaiñ ba thymmai ha Mawdiangdiang, New Shillong Township.
U tnum pyllun ba la tei pynitynnat ha kane ka Ïingdorbar Thawaiñ ba thymmai u la khyllem noh ha ka step jong ka 22 tarik, Jymmang, 2022.
Ka HPC ka la shim ai ïa kane ka jingmynjur ha ka jingïalang ba la pynïaid da u Lamphang jong ka Ïingdorbar Thawaiñ ka Jylla u Thomas A. Sangma ba la ïashim bynta lang da u Myntri Rangbah ka Jylla u Conrad Kongkal Sangma, u Symbud Lamphang u Timothy D Shira, ki MLA ba kynthup ïa u Bah Charles Pyngrope, u Bah Lahkmen Rymbui bad u Bah Banteidor Lyngdoh, kynthup ruh u Chief Secretary u Bah Donald P. Wahlang, u Commissioner & Secretary jong ka Meghalaya Assembly u Dr. Andrew Simons bad ki ophisar.
Haba kren sha ki lad pathai khubor hadien ba la wai ka jingïalang u Lamphang u la ïathuh ba ka jingshong jingïalang jong ka HPC ka long tang ban shu ai jingmynjur ïa ka rukom pynwandur ba thymmai jong u tnum pylllun bad ban ai jingmynjur ha kaba ïadei bad ka jingmang pisa da kaba pynpaw ïa ka jingkiew dor jong ka jingtrei.
U la ïathuh ba ïa kane ka jingshna pynwandur ba thymmai yn sa thew sa woh da ka IIT Roorkee bad ka IIT Guwahati, bad bynrap ba ka jingpyntrei ïa ka Ïingdorbar Thawaiñ kan sa sdang biang nangne shakhmat.
“Ka jingtrei kan sa ïaid shaid shaid hadien ka lehniam Eid,’ la ïathuh u Lamphang.
U la ïathuh ba ka HPC ka la thung ruh ïa ka Programme Monitoring Committee (PMC) katkum ka jingai jingmut jong ka IIT Guwahati ha kaiphod tohkit halor ka jingkhyllem jong u tnum pyllun uba rim.
U la ïathuh ba la bynshet ha ka tnat PWD bad ha ka PMC ba kin peit lang ha kajuh ka por halor ka jingpyntrei ïa ka Ingdorbar Thawaiñ ha ka wat kaba ar.