Ha ki kynta balip light, kyndang ki nongtuh ïa ka ATM ha Lower Rynjah, rong ei ïa ki pisa

Shillong, Ïaïong 20 : Ki runar kibym pat shym la ithuh durkhmat ki la kyndang bad lied ïa ka kor sei pisa ne ka ATM jong ka State Bank of India kaba don ha Lower Rynjah bad rong ei ïa katto katne ki pisa kiba don hapoh jong kane ka ATM.
Katkum ka jingiathuh u nongpeit ïa katei ka ATM u bym shym la kwah ban pynpaw kyrteng ïalaee u la ong ba kane ka jingjia ka la jia ha ka step jong ka 20 tarik Ïaïong 2023 ha ka por kumba 2 baje eiei kaba dang dei ruh ha ki kynta pynlip light. U la ïathuh ba kine ki nongtuh ki don kumba hynñiew ngut eiei ïa kaba la suba ba ki la pyndonkam da ki nar ha kaban kyndang ia katei ka ATM.
Ki runar ki la pynpra ruh ia ka jingkhang bad rung sha ka bynta ba shadien jong ka ATM ha kaba ki la ot ruh ia ki wire. U la ïathuh ba ki don kiba sah marjan kiba la ïohsngew ba don briew hapoh ATM, hynrei namar ba kim nud ban leit hajan ki la shu pynthaba da ka torchlight ha kaba kitei ki nongtuh kiba don kumba hynñiew ngut ki la phet krad noh.
Katkum ka jingïahuh jong une u rangbah, kitei ki nongtuh kim shym la ïoh lut ia ka pisa kaba don hapoh ka ATM na kadaw ka jingskhem ka mashin ba buh ia ki pisa hynrei ki la ïoh rah tang katto kante kiba sahkut na ka jingbym treikam ha ka por ba ki briew ki leit sei pisa. Halor kane na ka liang ki pulit ki la leh ïa kaba donkam bad tohkit halor kane ka jingjia.