Byrngem ïakhih ki nongtrei ka MeECL lada ym siew ïa ka tulop shwa ka 21 tarik, ïaïong

Shillong, ïaïong, 20: Ka Coordination Committee of Registered MeECL (Employees) Associations and Unions (CCORMAU) ka la byngem ban pynlong da ka jingïakhih lada ka Meghalaya Energy Corporation Limited (MeECL) kam lah ban pyllait noh ïa ka tulop na ka bynta u bnai Lber 2023 shwa ka 21 tarik mynta u bnai, kaba long katkum ka Code on Wages, 2019.
Ka CCORMAU ka la shim ïa kane ka rai ha ka jingïalang kaba kyrkieh kaba la long ha ka sngi Palei.
Ha ka shithi ba la phah sha u Chairman cum Managing Director (CMD) jong ka MeECL u Sanjay Goyal u President jong ka ka CCORMAU u Bah PK Shullet u la ong ba bunsien ka seng ka la phah ïa ka jingthoh halor ka jingdawa ban pyllait noh ïa ka tulop ha ka por kaba biang. “Ïa ka dorkhas la phah ha ka 9 tarik, Kyllalyngkot, 2023, hynrei wat hapdeng ki jingpynsngew, ïa ka tulop jong u bnai Lber 2023 ym shym la pylait satia haduh mynta,” ong u kyrwoh.
Katkum ka Code on Wages, 2019, ki nongtrei ki dei ban ïoh ïa ka jingsiew bainong manla u bnai shwa ban kut noh ki hynñiew sngi jong u bnai u ban wan, ong ka dorkhas ba la phah da ka seng sha u CMD bad bynrap, ka tulop na ka bynta u bnai uba bud dei ban pyllait katkum ka Code on Wages, 2019, hynrei lym kumta yn pynlong da ka jingïakhih ha ka sngi longtrei.
U Bah Shullet u la pynpaw ba lada ki bor ba dei peit kim pyllait ïa ka tulop katkum ka por ba la buh, ki nongtrei kim banse ban pynlong da ka jingïakhih ha ki sngi longtrei ha ki ophis treikam jong ki.