Pdiang burom ki nongïalam ka TPF ïa u Bah Ardent ha Chennai ban long Kongsan ha ka Conference
Shillong, K’lyngkot 04: U Bah Ardent Miller Basaïawmoit, President ka Seng VPP ryngkat bad saw ngut kiwei pat ki nongïalam ka Seng ki la poi ha nongbah Chennai mynta ka sngi ban leit ïashim bynta ha ka Conference ba la pynlong da ka Tamizhnadu People’s Front ((TPF) ka ban long ha ka 6 tarik mynta u bnai.
Ïa kane ka Conference kaban pynlong ha Royapuram Arivagam, Chennai la ai kyrteng ka “Conference Against Facist Bramanism”, lane ka jingïalang ban pyrshah ïa ki kam synshar donbor bad leh baheh.
U Bah Ardent u la shah khot ban long kum u Kongsan ha kane ka Conference. Ïa u President jong ka VPP la synran lang da ki saw ngut kiwei pat ki nongïalam.
U Bah Ardent bad kine ki nongïalam, ki la mih na Shillong hynne mynstep ha kaba la leit synran da ki katto katne ki dkhot jong ka VPP haduh Guwahati Airport bad u la poi ha Chennai Airport ha ka por mynsngi ha kaba la pdiang sngewbha da ki nongïalam ka TPF da kaba pyndeng da u kpieng bad pynkup da ki jaiñ tynrai ki jaitbynriew Tamil ha katei ka kad Liengsuiñ.
Kane ka Conference kan ïakren bad ïatai halor ki kam synshar donbor, ki kam synshar leh baheh kiba long ka jingma ïa ka jingïalong kawei jong ka ri India bad jingïalong shitylli jong ka ri bad kaba pynsting ruh ïa ka jingïasam ïa ka jingsynshar khadar jong ka sorkar pdeng bad ki sorkar jylla.
Na ka liang jong ka Seng VPP lyngba ka kyrwoh ba la pyllait da u Dr. Batskhem Myrboh, Spokesperson jong ka Seng ka ai khublei ïa ka Tamizhnadu People’s Front ((TPF) kaba la pynlong ïa kane ka Confrence kaba long kaba donkam bha na ka bynta ban tehsong ïa ka jingïalong kawei. Ka Seng ka kitbok kitrwiang ruh ïa u Bah Ardent bad ïa ka jingïalang hi baroh kawei ba kan long kaba ïaid beit bad wanrah ka jingïatai kaba seisoh.
Ka Seng ka pynkynmaw ruh ba dei u Bah Ardent Basaïawmoit, MLA jong ka Nongkrem ryngkat bad kiwei pat ki MLA ka VPP kiba la ïeng pyrshah ïa ka jingthmu jong ka sorkar pdeng ban pynrung jubor ïa ka ktien Hindi ha ki paidbah ha kaba u Lat ka Meghalaya, u Phagu Chauhan, u la kren da ka ktien Hindi ha ka por ba u ai jingkren lamphrang ha kaba sdang jong ka ïingdorbar ha u snem baladep.