Haduh 61 tylli ki shnong ha Langpih Sector kam ka Meghalaya, shen yn jurip lang bad ka Assam

Shillong, K’Lyngkot 04 : Ka Meghalaya ka la dep phah ïa ka jingkam jong ka ïa ki palat 61 tylli ki shnong kiba hap ha Langpih Sector, kiba dei shi bynta jong ki hynriew tylli ki jaka kajia pud ba dang sahteng ban pynbeit bad ka Assam.
Ki Regional Committee ba la thaw da ka Meghalaya bad Assam shen kin sa phah ïa ki kaiphod ba pura hadien ba ki la dep ban jurip lang ïa ka Langpih Sector ha West Khasi Hills.
Haba pyntip ïa kane, u Chairman ka Regional Committee jong ka West Khasi Hills, Bah Paul Lyngdoh u la ong, “Ha ka jingïalang, ngi la dep ban phah haduh 61 tylli ki shnong bad ïa kine mynta ka sorkar Assam ka dang peit bniah.”
Shuh shuh u la ïathuh ruh ba ki la dep ban ïa syllok sani bha haba ïadei bad kitei ki shnong bad ka jingïakren mynta ka dang ïaid ryngkat ka jingkyrmen.
Katkum ka jingong jong u, kitei ki 61 tylli ki shnong ki dei kiba bun ki nongshong shnong kiba dei ki Khasi bad Garo bad don pat kiba khleh lang katba don ki shnong kiba don tang ki jaidbynriew nepali.
U Bah Paul uba dei ruh ha kajuh ka por u Myntri ka sorkar jylla u la pyntip ba ka jingleit jurip lang bad ka Assam ka la dei ban long ha u Naiwieng jong u snem ba la dep. Hynrei haka jingkren bad u Chairman ka Kamrup District sector u Chandra Mohan Patowary u la pynpaw ïa ka jingbym pat lap jong u ban leit jurip lang bad pan por bad dei na kane ka daw ba katei ka kam ka dang sahteng haduh mynta.
“Hynrei, nga dang ïa kren ïa kane ka kam bad u. Kane kadei ka kam jong ki arliang mamla bad kumta ka Meghalaya kam lah ban shu leh hi. Kaba mut ba ngim lah ban phah ïa ka kaiphod khlem da donlang na ka liang ka Assam ban leit jurip lang bad ngi kaba ngi khmih lynti ba kan sa long shen,” u la ong.
U Bah Paul u la ong ruh ba mar ïa ïoh jingtip na u Patowary, kin sa pynbeit ïa ka por ban leit jurip sha kitei ki jaka bad hadien kane kin sa phah lang ïa ka kaiphod kaba pura. La ïathuh ruh ba ki la dep don lypa ki jingïakynduh hapdeng ki arliang mamla la ka long ha Shillong bad kumjuh ha nongbah Guwahati hynrei kaba sah mynta ka long satang ban leit jurip lang sha ka jaka.
Shuh shuh u la ong ruh ba ka Committee kan pan por na ka bynta ban pynjlan ïa ka jingphah ïa ka kaiphod kaba pura hadien ba ka sorkar dang shen ka la buh ba ka tarik ban phah ïa ka kaiphod kadei ha ka 31tarik Nohprah, 2023.
Nalorkata, u Chairman ka Committee u la ïathuh ruh ba ka jingleit jurip lang sha ki jaka ba don ka jingkajia pud kadei tang ban wanrah ïa ka jingsngew shngaiñ ha ki nongshong shnong ba ki ar sorkar ki trei lang na ka bynta ban pynbeit noh ïa baroh ki jingsngew ïapher khnang ba kin lah ban im da ka suk ka sain ha kito ki shnong.