Byrngem pynbthei bom ki lehnoh ha man la ki Iing Bishar ka India kynthup ha Meghalaya

Shillong, Kyllalyngkot 5 : Ki Pulit jongka jylla Meghalaya ki la peitngor pyrkhing bha hadien ba la ioh pdiang ia kawei ka jingthoh lyngba ka mail mynta ka Sngi Thohdieng kaba la byrngem da ka kynhun lehnoh ba ka la dep buh bom ha man la ki Iing Bishar jongka ri India kynthup ruh ha ka Iing Bishar High Court jongka jylla Meghalaya.
Ka Iing Bishar High Court jongka jylla ka ioh pidang ia kane ka mail ha ka por 5.45 baje mynstep jong ka Sngi Thohdieng.
Kat kum ki jingwad bniah la lap ba ia kane ka mail la phah na ka Morguelol545@gmail.com ha kaba la kam ruh “ Nga la dep buh bom hapoh ki Iing Bishar jong baroh ka ri India. Ia kine ki bom la buh  ha ka jaka ba rieh bha bad kin sa bthei ha ka por mynstep. Phin sa mad ia ka jinglyngkien ka snam.
“Ngi dei na ka kynhun lehnoh kaba la tip kum ka Terrorizers111. Ai ia ka kyrteng jong ka kynhun jong ngi sha ki Lad Pathai Khubor ruh ngin ym sangeh na ka jingleh ia ki kam pyntriem jong ngi”
Ia kane ka Mail la phah sha baroh ki iing bishar jongka ri India.
Na ka liang u SP ka East Khasi Hills u bah Sylvester Nongtnger u la iathuh ba ki pulit ki la ioh jingtip ia kane bad ki la long kiba peitngor pyrkhing bha bad la bthah ruh ia ki bor pahara ha ki iing bishar ba kin long kiba peitngor bha ia ka jingapphira jongki.
La iathuh ruh ba ki bomb squad ryngkat bad ki ‘sew bud dien ki la leit mynta ka sngi sha ka iing bishar High Court jongka jylla ban wad bniah ioh don shisha kita ki jingbuh bom.