Mawkyrwat, K’lyngkot 23: Ka Hills State People’s Democratic Party (HSPDP) jong ka Mawkyrwat Circle mynta ka sngi ka la ïoh ban pdiang burom ïa ki nongkyrshan ba thymmai kiba la wan rung ban long ki nongkyrshan ba pura jong ka HSPDP ha kaba ïa ka jingïalang pdiang burom la pynlong ha ka ophis treikam jong ka party ka Mawlangwir, South West Khasi Hills District.
Ki nongkyrshan ba thymmai ba la pdiang burom ki long na ka United Democratic Party (UDP) bad Indian National Congress (INC) ha kaba u bah Medalsing Lyngdoh, Working President bad u kyrtong ka HSPDP Mawkyrwat Constituency u la ïoh ba pdiang ïa ki ha ryngkat ka jingïadonlang u President u bah Nolipstar Lyngdoh, u General Secretary ka HSPDP Mawkyrwat Circle, bah K.D. Wanniang bad kiwei de ki nongkitkam ba hakhmat jong ka HSPDP Mawkyrwat Circle.
Lah ba kdew ruh ba kiba la shah pdiang sngewbha ha kane ka sngi ki long u bah Losmander Marweiñ, uba bat ïa ka kam Vice President jong ka UDP Mawkyrwat Circle, u bah Maksdenroy Jyrwa, uba bat kum u President ka Mawbidong Primary Unit jong ka Congress ha ryngkat ki nongbud jong ki.
U bah Losmander Marweiñ, haba kren ha ki lad pathai khubor hadien ka jingshah pdiang sngewbha burom ha ka HSPDP Mawkyrwat Circle u la ong ba ka jingwan rung jong ki ha kane ka party kim shym don daw bad no bad no ruh haba ki mih noh na ka UDP, hynrei ki la mih da ka jingtip namar ki la dep ban ai ka jingpyntip lypa sha ki nongïalam jong ka UDP Mawkyrwat Circle. “Ka jingmih noh jong u bad ki katto katne ki nongkyrshan ka long ba hadien ba ki nongïalam kiba dang shu wan rung thymmai ha ka UDP kim shym la kheiñ briew shuh ïa ki nongïalam barim bad ma nga kum u Vice President lei lei u sah tang ka kyrteng bad ki jingtreikam ruh kim ïa dei shuh kumba long mynshwa”, ong u bah Losmander.
Kumta, halor kane ka bynta u la ong ïathuh ruh ba naduh ba u dang don mynshwa bad ka UDP hapoh ka jingïalam jong u bah Anvil Lyngdoh ki kam ki jam ki long kiba sngewtynnad ban ïatrei hynrei ha kine ki khyndiat sngi hadien ka jingwan rung jong u bah Renikton kim long shuh kumta. Namarkata, kim banse ban mih noh ban wan pynïasoh thymmai noh sha ka HSPDP hapoh ka jingïalam jong u bah Medalsing Lyngdoh lem bad ka kynhun.
Ha kawei pat ka liang u bah Losmander u la ong ba lyngba ka jingwan rung jong ki ryngkat ki nongkyrshan, u bah Medalsing un sa jop ha kane ka MLA Election 2023.
