Nongstoiñ, K’lyngkot 23: Na ka bynta ban pynïaid beit ïaid ryntih ïa ka election ka ban sa long ha u bnai ban wan, mynta ka lah sngi u Blei u bah Garod LSN Dykes Deputy Commissioner k West Khasi Hills u ba dei ruh u Election Returning Officer jong ka West Khasi Hills, u la khot jingïalang ïa baroh ki kyrtong jong ki Seng Saiñ pyrthei na ki lai tylli ki constituency kata ka 32 Nongstoiñ, ka 33 Rambrai Jyrngam bad ka 34 Mawshynrut Constituency, bn pynshai ïa ki kyndon ba la bthah da ka Election Commission of India kaba la pynmih naduh ka 18 tarik mynta u bnai.
Ha katei ka jingïalang kaba la pynlong ha Conference hall jong ka ophis u DC, ki don ki kyrtong kiba la shimkhia bad ki la ïapoi ha ka por kaba biang, hynrei don pat ki kyrtong ki bym shym la poi da lade hynrei ki la phah ïa ki election agent jong ki ba kin leit ban ïashim bynta.
U Deputy Commissioner u la pynshai ïa baroh ki kyndon ba ki kyrtong kiba ïaleh election, ba ki dei ban leh ha shuwa ba kin sdang ban leit pynlong jingïalang la ha ki jaka paitbah, ha ki shnong ki thaw bad kiwei kiwei ki jaka. Nalor kata u la pynshai ruh halor ki kyndon kiba ka Election Commission of India ka la bthah ba ki dei ban bud ryntih, kum ka jingtah ïa ki poster ha ki kynroh la ki dei ki jaka jong ki riew shimet ne ki jaka ba la shna da ka sorkar.
Haba pynshai halor kitei ki kyndon u DC, u la ong ba katkum ka jingbthah jong ka Election Commission of India ka long ba ha suwa ban tah ïa ki poster lane wah ïa ki banner ki dei bn da pan jingbit. Nalor kata u la ong ba wat lada ki dei ki jaka jong ki riew shimet, kiba leit tah poster ki la tip thikna ba kim ong ei ei ruh ki dei ban da pan jingbit da ka jingthoh khang ba lada kin ym sngew dei shuh ban kylla ktien haduh ban da kut ka election.
U la pynkynmaw ba na ka liang ka Election Commission ka la ai bor ha baroh ki District Magistrate hapoh ka jylla, ba kin pyntreikam pura ïa ka kyndon 144 Crpc kata ban ym shah ban rah kino kino ki tiar pynmynsaw bad wat kito ki ba don ïa ki suloi ba la ïoh laisen ruh yn ym shah satia.
U la pynshai ruh ha kaba ïadei bad ka jingpyndonkam ïa ki kor jingsawa ba ki dei ban bud ryntih kt kum ka por ba la buh da ka sorkar. U la kyntu ïa baroh ki kyrtong bad ki Election Agent jong baroh ki Seng Saiñpyrthei, ba ki dei ban shimkhia bad bud ryntih ïa baroh ki kyndon ba la buh da ka Election Commission of India, khnang ba ka election kan long kaba ïaid beit haduh ba kut.
