Ishu ILP, khappud bad ktien khasi, ki mat elekshon ka BJP Nongstoiñ
Rwai National Anthem ka BJP ha ka sngi long jingïalang
Nongstoiñ, K’lyngkot 23: Ka BJP Nongstoiñ Mandal ka la rai ban phah tyrwa sha Delhi lyngba ka State level ïa ki lai tylli ki mat ïakhun elekshon MLA. Kine ki long ka ILP, border ishu bad ban pynrung ïa ka kyntien khasi ha ka khyrnit kaba phra. Kine ki dei kiba ka BJP Nongstoiñ ka kwah ba ka BJP kan mynjur ha ka manifesto jong ka State party.
U Working President ka party BJP Nongstoiñ u ba long ruh u ex MLA na ka party HSPDP u bah D. Jyndiang, haba kren sha ki lad pathai khubor ha ophis ka party mynta ka sngi, u la ong ruh ba hadien ka jingwan ki nongïalam ka state level ha Nongstoiñ ha ka 18 tarik, mynta ka sngi pat ki la jied bad pynrung thymmai biang ïa ki dkhot ka party. La rai ruh ban sdang pynkhlaiñ ïa ka party ha ka liang ki rangbah, longkmie, samla bad ki nongrep.
Ha kaba ïa dei bad u kyrtong u ban ïakhun na ka party na Nongstoiñ, na ka liang u bah D.Jyndiang u la ong ba ha ka jingshisha ki don ar ngut kiba kwah tiket ba kynthup ïa u kum u ex MLA. Hynrei, uwei pat u la dep rung noh wur wut sha ka congress mar syn rung ma u sha ka BJP. Kumta, u don jingkyrmen ba un ïoh ïa ka tiket ha kaba ka party na Delhi kan sa ai ïa ka rai ba khatduh ha kine ki khyndiat sngi ban wan.