Nongstoiñ, K’lyngkot 23: San sngi hadien ba u Conrad Kongal Sangma Myntri Rangbah ka Jylla u la dep ban wan plie ïa ka jingtei ba thymmai jong ka Sib Singh Memorial Government Higher Secondary School, kaba la mang kumba saw klur tyngka, mynta ka lah sngi u Blei, ki nongïalam jong ki ar tylli ki sengbhalang kata ka West Khasi Student Union bad ka United Hynñiewtrep Movement, ki la hiar ban jurip ïa katei ka jingtei ba thymmai ban dup tip la ka la bit la biang ne em ban pynlong noh ïa ka skul.
Ha katei ka jingleit jurip ki la lap ba ïa ka jingtei la pyndep ha ka rukom kaba dei kat kum ba mang pisa da ka sorkar ,hynrei ki dang don katto katne ki jingduna kiba dang donkam ban pynbiang kum ka um, ki ben, ki miej, ki blackboard bad ïa ka phyllaw jong katei ka skul ruh dang shu iehnoh kumto khlem pat siang dewbilat.
U samla L.Khardewsaw Education Secretary ka WKSU haba ïakren bad u nongthoh khubor, u la ong ba ha kaba ïadei bad ka jingbym pat siang dewbilat ïa ka phyllaw ki nongïalam jong kitei ki sengbhalang ki la ïoh ban ïakren bad u kontraktor uba pyntrei ïa katei ka jingtei, ha kaba u la ïathuh ba ka sorkar kam shym la mang pisa na ka bynta ban siang dewbilat ïa katei ka phyllaw.
Ha kaba ïadei bad ka jingbym pat lah ban pynbiang ïa ki jingdonkam hapoh ki kamra klass, kitei ki nongïalam jong ki sengbhalang ki la kyntu ïa ka sorkar lyngba ka Education Department, ba ha shuwa ban plie skul ka la dei ban pynbiang lut nadong shadon khnang ba kan ym pynthut ïa ki khynnah kiba leit pule.
Nalor kata pule ki la ong ruh ba ïa katei ka phyllaw ruh na ka liang ka tnad kaba peit ïa ka pule puthi ha ka jylla, kan sngewbha ban mang pisa noh kham kloi namar lada shu ieh kumto, ha ka por lyiur ka phyllaw kan ktieh bad kan ym don satia ka jingkhuid jingsuba ha ki sawdong sawkun jong ki kamra klass bad kan ym I long ryntih ym tang ïa ka skul hynrei wat ïa ki khynnah skul ruh.
