Khliehriat Ïaïong 24 : Ka dei shisha kaei kaei kaba pynsngewkmen ïa Jaidbynriew kumjuh ruh ïa ka Jylla hi baroh kawei hadien ba ki shikpa shikhun na East Jaiñtia Hills ki la wan shakhmat ha ka ïakob pynmareh kali kaba la tip kum ka 27th Motocross and Autocross ba la pynlong da ka Mizoram Motor Sport Association (MIMSA) ha ka 21 bad 22 tarik mynta u bnai ha nongbah Aizawl, Mizoram.
U samla Gareth Pariat bad u kpa, u Bah Mihsalan Bareh ki mihkhmat na ka EJAMSA bad shimbynta ha ka Autocross Open Category. Ha kane ka Autocross Open Category u Gareth u la ïoh rah ïa ka nam lahduh katba u Bah Mihsalan u la rah ïa ka kyrdan kaba lai katba ïa ka kyrdan kaba ar la ïoh rah da u William Lalmalsaura. Nalor kane, sa uwei u samla Khasi-Pnar uba la wanrah burom u dei u Remeky Nongtdu uba la wan nyngkong ha ka ïakob Novice category, une u samla u dei na ka shnong Sutnga.
