Hapdeng ka jingiphuh iphieng pynhap pyrda noh ka Ïewrynghep SS ïa ka 9th Annual Sports Meet 2023

Shillong, Ïaïong 24 : Ka Ïewrynghep Secondary School, Mawñianglah Upper Shillong ha ka sngi Nyngkong (24-04-2023) hapdeng ka jingiphuh iphieng ka la pynhap pyrda noh ïa ka lympung ïalehkai kaba la tip kum ka 9th Annual Sports Meet 2023.
Ïa kane ka Sports Meet la pynhap pyrda noh da u Bah Lionel Nongkhlaw kum u Kongsan ha ka jingïadonlang ki dkhot jong ka Managing Committe, u Rangbah Shnong Bah Shining Kharkongor, ki nonghikai ha madan ïalehkai phutbol jong ka Mawñianglah. Ha kane ka Annual Sports Meet 2023 kaba khyndai ïa ka nam lahduh la ïoh rah da ka Blue House kaba la jer kyrteng da ka Amartya Sen.
Haba ai jingkren kum u Kongsan, u Bah Lionel Nongkhlaw u la kyntu kynpham ïa ki khynnah skul ba kidei ban long adkar ha baroh ki liang ha kum kine ki sngi ba mynta bad ai mynsiem ruh ïa ki ba kidei barobor ban pynmlien ban kilan met ryngkat ka pule puthi.
Haba kren kum u Symbud Kongsan u Bah Shining Kharkongor u la ïaroh ïa ka school ba ka la kiew ha baroh ki liang bad sngewsarong ruh ban ïohi ba ki skul nongkyndong ki la kiew bha ha ka pule puthi bad ha ki kam ïalehkai.
La pynshongshit ruh ha kane ka sngi da ka jingïalehkai pyndap um ha ki bilor ba la ïashim bynta da ki kmie kpa jong ki khynnah skul, ki dkhot ka SMC, ki kongsan bad ki khynah skul. Ïa ka nam jop la ïoh rah da ka kynhun jong ka SMC.
Ha kane ka sngi la ïa don lang ruh u Principal ka School, u Bah Steferd Rynjah bad ki kmie ki kpa jong ki khynnah kiba la wan ban sakhi ïa kane ka jingpynhap pyrda. Kum ban shu pynkynmaw hangne ba ka Ïewrynghep Secondary School ka la leit ban mihkhmat ïa ka Jylla sha ka lympung ïalehkai International Subroto Cup 2022 ha Delhi.